बुटवल, कात्तिक १४/बुटवलका विभिन्न स्थानबाट ८ जना जुवाडे पक्राउ परेका छन्।ईलाका प्रहरी कार्यालय बुटवलले बुटवल उपमहानगरपालिका वडा नं. ११ कालिकानगर र वडा नं। ४ ट्राफिकचोकबाट जुवा खेल्दै गरेको अवस्थामा उनीहरूलाई रंगेहात पक्राउ गरेको हो ।
मंगलबार राति ११ बजेको समयमा बुटवल ११ कालिकानगरस्थित ध्रुव खड्काको घरमा जुवा खेल्दै गरेका गुल्मी रुरु गाउँपालिका वडा नं. ४ का २६ वर्षीय रेशम खड्का, ३२ वर्षीय चन्द्र गौतम, ४२ वर्षीय कुसुम खड्का र ३६ वर्षीय मुक्त बहादुर खड्कालाई पक्राउ गरेको प्रहरी जनाएको छ।
उनीहरूको साथबाट नगद ८२ हजार रुपैयाँ र एक सेट तास बरामद गरेको ईलाका प्रहरी कार्यालय बुटवलका प्रमुख प्रहरी नायब उपरीक्षक डिल बहादुर मल्लले जानकारी दिए ।
त्यसैगरी मंगलबार राति ८ बजे बुटवल ४ ट्राफिकचोकस्थित झिमा होटलबाट चार जनालाई पक्राउ गरेको छ । उक्त होटलमा जुवा खेल्दै गरेको अवस्थामा होटल सञ्चालक ५४ वर्षीय लोकनाथ न्यौपाने, ३६ वर्षीय टिका क्षेत्री, तिलोत्तमा नगरपालिका वडा नं. ७ बस्ने ४६ वर्षीय राजाराम यादव र पाल्पाको बगनासकाली गाउँपालिका वडा नं. ३ का ६१ वर्षीय रामप्रसाद श्रेष्ठलाई पक्राउ गरिएको प्रहरीले जनाएको छ ।
उनीहरूको साथबाट नगद ३ लाख ९४ हजार रुपैयाँ र ३ सय ६४ पत्ति तास बरामद गरिएको प्रहरीले जनाएको छ । पक्राउ गरिएका सबै जनालाई आवश्यक कारबाहीको लागि ईलाका प्रहरी कार्यालय बुटवलमा राखिएको प्रहरीले जनाएको छ ।
