गुल्मी जिल्लाको मदाने गाउँपालिका–४ म्यालपोखरी निवासी ४५ वर्षीया कमला दमाई आगलागीबाट गम्भीर घाइते हुनु भएको छ । गोठमा राति सुतिरहेको अवस्थामा अचानक आगलागी हुँदा उहाँको शरीरको अधिकांश भाग जलेको छ । छिमेकीहरूको ठूलो प्रयासपछि कमलाको ज्यान जोगिएपनि अवस्था गम्भिर छ ।
आगोले जलेर गम्भिर भएकी कमलाको पाल्पाको तानसेन स्थित मिसन अस्पतालमा उपचार भईरहेको छ । आर्थिक रुपमा विपन्न यो परिवार आगलागीले घर–गोठसहितको अवस्था अत्यन्तै दयनीय बनेको छ भने परिवार आर्थिक संकटमा परेको छ ।
यसैबीच, पीडितको उपचारमा राहत पुगोस भन्ने उद्देश्यले मदाने गाउँपालिकाका अध्यक्ष महेन्द्रबहादुर कुवरले आर्थिक सहयोग गर्नुभएको छ । अध्यक्ष कुवरले अस्पतालमै पुगेर पालिकाबाट पाउने सुविधाअन्तर्गतको रकमबाट १० हजार रुपैंया आर्थिक सहयोग गर्नुभएको हो ।
नेपाली काँग्रेस मदानेका सभापति समेत रहनुभएका अध्यक्ष कुवँरले पार्टी समितिको निर्णयमा अस्पतालमै पुगेर १० हजार रुपैंयाको चेक विराम कमलालाई हस्तान्तरण गर्नुभएको हो ।
गाउँपालिकाको अध्यक्षमा निर्वाचित भएदेखि नै अध्यक्ष कुवरले आफूले पाउने सुविधा वापतको रकम सिधै पार्टी खातामा जाने र त्यसरी प्राप्त भएको रकम पार्टी समितिको निर्णयमा पालिका भित्रका गरिव विपन्नहरुको स्वास्थ्योपचार तथा शैक्षिक कृयाकलापमा खर्च गर्ने गरिएको उहाँले बताउनु भयो । उहाँले यस किसिमका विपद् र पीडाका बेला स्थानीय सरकार र राजनीतिक दलले मानवीय संवेदनाका साथ सहयोग गर्नुपर्ने बताउँदै सोही अनुसार सहयोग गरिएको र अरुले पनि सक्दो सहयोग गर्न आग्रह गर्नुभयो । उहाँको सहयोग प्रति पिडित परिवारले आभार व्यक्त गरेका छन् ।
