श्रीलंकामा सरकारले लागू गरेको कर्फ्यु उल्लंघन गरेको आरोपमा कम्तीमा ६ सय ६४ जनालाई पक्राउ परेका छन् । स्थानीय समय अनुसार शनिबार राति १० बजेदेखि आइतबार बिहान ६ बजेको बीचमा देशको पश्चिमी प्रान्तबाट उनीहरूलाई पक्राउ गरिएको हो ।
दैनिक उपभोग्य वस्तुको अभाव भएपछि चर्किएको आन्दोलन रोक्न सरकारले शनिबार बेलुका ६ बजेदेखि ३६ घन्टे कर्फ्यु आदेश जारी गरेको छ । कर्फ्यु लागू भएका वेला अनुमतिविना हिँडडुल गर्न नपाइने भए पनि हिँडडुल गरेकाले उनीहरूलाई पक्राउ गरिएको वरिष्ठ प्रहरी निरीक्षक निहाल थाल्डुवाले जानकारी दिनुभयो ।
त्यस्तै कर्फ्यु आदेशसँगै सामाजिक सञ्जालमा पनि प्रतिबन्ध लगाइएको छ । प्रदर्शन रोक्नका लागि सेनालाई बिना वारेन्ट पक्राउ गर्ने अधिकार पनि दिइएको छ ।
बीबीसीका अनुसार श्रीलङ्कामा फेसबुक, ट्विटर, इन्स्टाग्राम लगायतका सामाजिक सञ्जाल बन्द गरिएका छन् । राष्ट्रपति गोटाबाय राजापाक्षेले अधिकारीहरूको लिखित अनुमति बाहेक कुनै पनि सार्वजनिक सडक, पार्क, रेल वा समुद्री किनारमा जान पनि निषेध गरिएको आदेश जारी गर्नुभएको छ ।
सन् १९४८ मा बेलायतको उपनिवेशबाट स्वतन्त्र भएको श्रीलंका पछिल्लो समय चरम आर्थिक संकटमा रहेको छ । विदेशी मुद्राको अभावले इन्धन खरिद गर्न नसक्दा यहाँ इन्धन, खाद्यन्न, औषधि लगायतको अभाव भएको छ ।
