भन्सार छलेर अवैध रुपमा नेपालबाट भारततर्फ लैजाँदै गरेको ३० क्विन्टल मटर र ढुवानीमा प्रयोग भएको गाडिसहित रुपन्देहीको कोटहीमाईबाट प्रहरीले बुधबार दुई जनालाई पक्राउ गरेको छ । अन्दाजी १२ लाख ४० हजार रुपैंया बराबरको मटर अवैध रुपमा लैजाँदै गर्दा प्रहरीले मुख्य कारोवारी रुपन्देहीको मर्चवारी गाउँपालिका वडा नं. १ का ३३ वर्षीय हरिशंकर यादव र गाडी चालक सोही गाउँपालिका वडा नं. ३ का २८ वर्षीय रामरतन यादवलाई पक्राउ गरिएको जिल्ला प्रहरी कार्यालय रुपन्देहीले जनाएको छ ।
ईलाका प्रहरी कार्यालय मझगावाबाट खटिएको प्रहरी टोलीले कोटहीमाई गाउँपालिका वडा नं. ५ दुईमुहानबाट ३० क्विनटल मटर, मटर ढुवानीमा प्रयोग भएको लु १ ज ४५१८ नम्बरको पिकअप गाडी सहित उनीहरुलाई पक्राउ गरिएको जिल्ला प्रहरी कार्यालय रुपन्देहीका प्रवक्ता प्रहरी नायव उपरिक्षक सत्यनारायण थापाले जानकारी गराउनु भयो ।
बरामद गरिएको मटर तथा ढुवानीको साधन सहित पक्राउ परेका उनीहरुलाई आवश्यक कारवाहीको लागि राजश्व अनुसन्धान कार्यालय बुटवल पठाईएको प्रहरीले जनाएको छ ।