रुपन्देहीको सैनामैनाबाट एक बृद्धलाई फलाम दिई हातमा लगाएको सुनका गहना लिई फरार हुने दुई जना रुपन्देहीकै कञ्चन गाउँपालिकाबाट पक्राउ परेका छन् ।
हेर्दा सुनजस्तो देखिने रङ्ग लगाएको सुनौलो रङ्गका ९ वटा फलामको ढिक्का दिएर बुटवल १७ की ४० वर्षीया धन सोमैको साथबाट हातमा लगाउने ब्रासलेट (सुनको चेन) लिएर फरार भएका रुपन्देहीको गैडहवा गाउँपालिका वडा नं. ९ धुसवाका ३७ वर्षीय काके उपनामका धनबहादुर सुनार र अर्घाखाँची मालारानी गाउँपालिका वडा नं. ३ का रुपन्देहीको कञ्चन १ हात्तिबजार बस्ने ३७ वर्षीय कोनविन भनिने देवबहादुर मगरलाई प्रहरीले गत शनिबार कञ्चनको हात्तिबजारबाटै पक्राउ गरिएको जिल्ला प्रहरी कार्यालय रुपन्देहीका प्रवक्ता नवरत्न पौडेलले बताउनु भयो ।
प्रहरीले उनीहरुको साथबाट सुन जस्तो देखिने पँहेलो पदार्थ लगाएको फलामको ढिक्का ९ थान, विभीन्न कम्पनीका ४ सेट मोवाई, गोल्डेन रङ्ग सहितको १ थान बट्टा, पिडितको ब्रासलेट गालेर बनाएको १ तोला ७ लाल ८ पोईन्ट सुनको डल्ला बरामद गरिएको प्रवक्ता पौडेलले बताउनु भयो ।
पुरानो बाँकी पैसा दिने बहाना बनाएर यहि जेठको ५ गते सैनामैना १० शितलापुर स्थित एक होटलमा बुटवल उपमहानगरपालिका वडा नं. १७ की सोमैलाई बोलाई पक्राउ परेका उनीहरुले त्यसैबेला सोमैलाई झुक्याएर सुनजस्तो देखिने ९ थान फलामको ढिक्का दिएर हातमा लगाएको सुनको ब्रासलेट (चेन) लिएर फरार भएका थिए ।
ठगि गरेर फरार रहेका व्यक्तिहरु कञ्चनको हात्तिबजारमा छन् भन्ने सूचनाको आधारमा ईलाका प्रहरी कार्यालय सालझण्डी रुपन्देहीबाट खटिएको प्रहरी टोलीले उनीहरुलाई पक्राउ गरेको हो । पक्राउ परेका उनीहरु उपर ठगी सम्बन्धी कसुरमा रुपन्देही जिल्ला अदालतबाट म्याद लिई थप अनुसन्धान भईरहेको पनि प्रवक्ता पौडेलले बताउनु भयो ।
