सुनका गरगहना चाेरी गरेकाे आराेपमा दुई जना भारतीय नागरिक पक्राउ परेका छन् । बुटवल उपमहानगरपालिका वडा नं. ११ बुद्धनगरमा रहेकाे एक सुनचादी पसलबाट सुनका गरगहना चाेरी गरेकाे आराेपमा प्रहरीले भारत बिहार मोतिहारी जिल्ला बैरिया थाना बस्ने ६० वर्षीय साबिर हुसेन र साेही ठाउँका ३५ वर्षीय तोफिक अलिलाई पक्राउ गरिएकाे हाे ।
उनीहरुलाई नवलपरासीबाट आज (बुधबार) पक्राउ गरिएकाे ईलाका प्रहरी कार्यालय बुटवलका प्रहरी नायव उपरीक्षक ठगबहादुर केसीले जानकारी दिनुभयाे ।
गत चैत २९ गते करिव ९ बजेकाे समयमा बुटवल ११ बुद्धनगरमा रहेकाे न्यू पाल्पा भैरव सुनचादी पसलमा चाेरी भएकाे थियाे । माेटरसाईकलमा आएका २ जना भारतीय मुलका ब्यक्तिले पसल सञ्चालक गाेविन्द विश्वकर्माका बुवा डिलबहादुर विश्वकर्माकाे अनुहारमा सेन्टजस्ताे पदार्थ छर्केर लठ्ठ बनाई ६ लाख ७४ हजार रुपैँया बढीकाे चाेरी गरी फरार भएका थिए ।
सुनका गरगहना चाेरी गरेकाे आराेपमा पक्राउ गरिएका उनीहरु उपर थप अनुसन्धान भईरहेकाे प्रहरी नायव उपरीक्षक केसीले बताउनु भयाे ।