बुटवल बसपार्कमा यात्रु सहायता कक्ष स्थापना

23

बुटवल बसपार्कमा यात्रु सहायता कक्ष स्थापना

बुटवलको बसपार्कमा यात्रु सहायता कक्ष स्थापना गरिएको छ । नजिकिँदै गरेको दशैं तिहार लगायतका चाडपर्वलाई ध्यानमा राखेर बुटवल उपमहानगरपालिकाले बुटवलस्थित नयाँ बसपार्कमा यात्रु सहायता कक्ष स्थापना गरेको हो ।
चाडवाडको समयमा यात्रुहरु अलपत्र पर्ने, ठगिने, असुरक्षा हुने र स्वास्थ्य सम्बन्धि समस्या हुन सक्ने भएकाले सहायता कक्ष स्थापना गरेको हो । सहायता कक्षबाट यात्रुहरुले स्वास्थ्य चेकजाँच, परामर्श, केही अत्यावश्यक औषधि, मास्कजस्ता सुविधा पाउने शिक्षा तथा जनस्वास्थ्य महाशाखा प्रमुख मित्रमणी खनालले जानकारी दिनुभयो ।
उहाँका अनुसार बसपार्कमा बुटवल उपमहानगरपालिकाले स्वास्थ्य सहायता, यात्रु सहायता र सरसफाईसम्बन्धि युनिट परिचालन गरेको छ । ‘हामीले बसपार्कमा आउने यात्रुको स्वास्थ्य परीक्षण, यात्रुलाई परेका समस्या समाधान र बसपार्क भित्रको सरसफाइ गर्ने कामको शुरुवात गरेका छौं ।’ उहाँले भन्नुभयो–‘यी तीनवटा युनिट चाडपर्वभरी निरन्तर बसपार्कमा रहनेछन् र आवश्यक समन्वय, सहकार्यको काम गर्नेछन् ।’
उहाँले चाडवाडमा यात्रुहरुको भीडभाड बढी हुने र बसपार्कभित्र फोहोर समेत बढ्ने भएकाले नियमित रुपमा औषधि छर्ने कामलाई पनि निरन्तर अघि बढाएको बताउनुभयो ।
कोभिड १९, डेंगु र अन्य स्वासप्रस्वासबाट सर्ने रोगलाई ध्यानमा राखेर मास्क लगाउनका लागि प्रेरित गर्ने र स्वास्थ्य सचेतना फैलाउने काम गर्नका लागि बिहान ७ बजेदेखि बेलुका ६ बजेसम्म सहायता कक्षमा कर्मचारी खटिने स्वास्थ्य शाखा प्रमुख युवराज पाण्डेले जानकारी दिनुभयो । उहाँले बसपार्कमा आएर अलपत्र परेकाको उद्धार तथा घरसम्म पुग्न बेखर्ची भएकाहरुलाई अवस्था हेरेर सहजीकरण र सहायता गर्ने बताउनुभयो ।