महासंघको सदस्यमा निर्वाचित अध्यक्ष कसजूलाई संघमा सम्मान

78

महासंघको सदस्यमा निर्वाचित अध्यक्ष कसजूलाई संघमा सम्मान

बुटवल उद्योग वाणिज्य संघ रुपन्देहीका अध्यक्ष उज्ज्वलप्रसाद कसजू नेपाल उद्योग वाणिज्य महासंघको कार्यसमिति सदस्यमा निर्वाचित हुनु भएकाेमा संघमा सम्मान गरिएको छ । उहाँलाई मंगलबार संघ सचिवालय बुटवलमा कार्यक्रमको आयोजना गरि सम्मान गरिएको हो । त्यसै अवसरमा राष्ट्रपतिबाट प्रज्ज्वल जनसेवा श्रीबाट विभूषित हुनु भएका संघका पूर्वअध्यक्ष तथा सल्लाहकार निर्मलप्रसाद लाकौललाई पनि सम्मान गरिएको छ ।
सम्मान कार्यक्रममा बोल्दै महासंघका नवनिर्वाचित सदस्य तथा संघका अध्यक्ष कसजूले आफूलाई निर्वाचित गराउनको लागि भूमिका खेलेको बुटवल उद्योग वाणिज्य संघ, पदाधिकारी कार्यसमिति सदस्यहरु, पूर्व अध्यक्ष तथा सल्लाहकारहरु र मतदातालाई धन्यवाद ज्ञापन गर्नुभयो । उहाँले यस क्षेत्रमा विद्यमान उद्योगी व्यवसायीका समस्या समाधानको लागि महासंघमा पहल तथा पैरवी गर्ने पनि प्रतिवद्धता व्यक्त गर्नुभयो ।
समान ग्रहण गर्दै पूर्वअध्यक्ष तथा सल्लाहकार लाकौलले राष्ट्रपतिबाट विभूषित हुन पाएकोमा खुसी व्यक्त गर्नुभयो । उहाँले यो प्रतिष्ठा प्राप्तिको लागि बुटवल उद्योग वाणिज्य संघको भूमिका महत्वपूर्ण रहेको बताउँदै उहाँले राष्ट्रपतिबाट विभूषित भएकामा सम्मान गरेकामा पनि संघलाई धन्यवाद व्यक्त गर्नुभयो ।
कार्यक्रममा बोल्दै संघका वरिष्ठ उपाध्यक्ष दिनेशप्रसाद श्रेष्ठले अध्यक्ष कसजूको जीतले सिंगो बुटवलको ईज्जत र प्रतिष्ठा बढाएको र संघको गरिमालाई अझै माथि उठाएको उल्लेख गर्नुभयो ।
त्यस्तै निवर्तमान अध्यक्ष खिमबहादुर हमालले सबैको एकता र बलियो साथका कारण अध्यक्ष कसजूले महासंघमा जित्न सफल भएको बताउँदै आगामी दिनमा पनि यो एकता कायम रहिरहने विश्वास व्यक्त गर्नुभयो । त्यस्तै पूर्वअध्यक्ष तथा सल्लाहकार अर्जुनमान सैंजूले अध्यक्ष कसजूको जीतमा एकताको बल प्रदर्शन भएको बताउँनु भयो । उहाँले आगामी दिनमा यस क्षेत्रका उद्योगी व्यवसायीका समस्या समाधानको लागि महासंघमा पहल गर्न महासंघका नवनिर्वाचित सदस्य कसजूलाई आग्रह गर्नुभयो । कार्यक्रममा संघका उद्योग उपाध्यक्ष टंकप्रसाद गैरे, सचिव मुक्ति अधिकारी लगायतले शुभकामना व्यक्त गर्नुभएको थियो ।
नेपाल उद्योग वाणिज्य महासंघको ५७ औं वार्षिक साधारण सभा तथा अधिवेशनमा जिल्ला नगरबाट खुल्ला सदस्य पदमा निर्वाचित कसजू ७२ मत सहित सातौं स्थानमा विजयी हुनु भएको हो । जसमा ११७ (सय प्रतिशत) मत खसेको थियो । खुल्ला तर्फबाट १८ सदस्य पदका लागि ३२ जनाको प्रतिस्पर्धा थियो ।
गएको चैत २८ र २९ मा सम्पन्न भएको महाधिवेशनबाट अध्यक्ष पदमा वरिष्ठ उपाध्यक्ष स्वतः अध्यक्ष हुने महासंघको विधान अनुसार चन्द्रप्रसाद ढकाल निर्वाचित हुनु भएको छ । आगामी कार्यकालको नेतृत्वका लागि समेत भएको निर्वाचनबाट वरिष्ठ उपाध्यक्षमा अञ्जन श्रेष्ठ निर्वाचित हुनु भएको छ । महासंघको वरिष्ठ उपाध्यक्ष पदमा अञ्जन श्रेष्ठ, उमेशलाल श्रेष्ठ र रामचन्द्र सांघाई विच प्रतिस्पर्धा भएको थियो ।
पहिलो चरणमा कसैले पनि ५० प्रतिशत मतभार कटाउन नसकेपछि सहमतिमा वरिष्ठ उपाध्यक्षमा अञ्जन निर्वाचित हुनु भएको हो । त्यस्तै जिल्ला नगर उपाध्यक्षमा सुरजकृष्ण वैद्य, बस्तुगत उपाध्यक्षमा हेमराज ढकाल र एशोसियट उपाध्यक्षमा ज्योत्सना श्रेष्ठ विजयी हुनु भएको छ ।