काठमाडौँ, १६ असार । नेपाल विद्यार्थी सङ्घका नेताले सङ्घभित्र देखिएका विवाद मिलाएर अधिवेशन गर्न नेतृत्वसँग माग गरेका छन् ।
नेविसङ्घ महाधिवेशन पक्षधर विद्यार्थीले आज यहाँ आयोजना गरेको ‘नेविसङ्घको ११ औँ महाधिवेशनका चुनौती’ विषयको बहसमा नेताले विधिवत् रुपमा अधिवेशन नगरे आमरण अनशन बस्ने चेतावनी दिएका छन् ।
कार्यक्रममा नेविसङ्घका पूर्व कोषाध्यक्ष कुन्दनराज काफ्लेले भागबन्डामा भन्दा विधिवत् अधिवेशन गरेर प्रतिनिधि छान्नुपर्ने बताउनुभयो । उहाँले भन्नुभयो, “सात दिनभित्र विधिवत् महाधिवेशनको प्रक्रिया अगाडि नबढाए अनशन बस्छौँ ।”
नेविसङ्घका पूर्वकेन्द्रीय सदस्य गणेश सापकोटाले विवाद समाधान कार्यदलले अहिलेसम्म काम गर्न नसक्दा समयमा नै अधिवेशन हुन्छ कि हुँदैन भन्ने आशङ्का जन्माएको बताउनुभयो । नेविसङ्घका केन्द्रीय सदस्य जित शेरचन, युवराज पाण्डे, बलदेव तिमल्सेना, तुलसा पन्त, नेविसङ्घ कैलाली सभापति विनय लामालगायतले महाधिवेशनको मिति तोक्नुभन्दा पनि विवादित समस्या समाधानमा वर्तमान नेतृत्व लाग्नुपर्ने बताउनुभयो ।
