उत्तर अमेरिकामा जारी फिफा विश्वकप २०२६ को क्वाटरफाइनल समीकरण पूरा भएको छ । बुधबार बिहान स्विट्जरल्यान्ड र कोलम्बियाबीचको अन्तिम प्रिक्वाटरफाइनल खेल सम्पन्न भएसँगै अन्तिम आठ टोलीको टुंगो लागेको हो । अब उपाधि होडमा फ्रान्स, स्पेन, इंग्ल्यान्ड, बेल्जियम, नर्वे, मोरक्को, अर्जेन्टिना र स्विट्जरल्यान्ड मात्र बाँकी रहेका छन् ।
यसपटक क्वाटरफाइनलमा युरोपबाट सर्वाधिक ६ टोली पुगेका छन् भने दक्षिण अमेरिकाबाट अर्जेन्टिना र अफ्रिकाबाट मोरक्कोले मात्र स्थान बनाउन सफल भएका छन् । कीर्तिमानी पाँच पटकको विश्व विजेता ब्राजिल, सहआयोजक अमेरिका, मेक्सिको र क्यानडा तथा क्रिस्टियानो रोनाल्डोको पोर्चुगल भने अन्तिम १६ बाटै बाहिरिएका छन् ।
साविक विजेता अर्जेन्टिना, पूर्व विजेता फ्रान्स, स्पेन र इंग्ल्यान्डले अपेक्षाअनुसार अन्तिम आठमा स्थान सुरक्षित गरेका छन् भने नर्वे, मोरक्को, बेल्जियम र स्विट्जरल्यान्डले उत्कृष्ट प्रदर्शन गर्दै उपाधि दौडलाई थप रोमाञ्चक बनाएका छन् । अब एक दिनको विश्रामपछि क्वाटरफाइनलका खेल सुरु हुनेछन् ।
प्रिक्वाटरफाइनलमा रोमाञ्चक प्रतिस्पर्धा
प्रिक्वाटरफाइनल चरण विश्वकपकै सबैभन्दा रोमाञ्चक चरणमध्ये एक बन्यो । धेरै खेल अन्तिम मिनेटसम्म प्रतिस्पर्धात्मक रहे भने केही खेलमा पुनरागमन र पेनाल्टी सुटआउटबाट नतिजा टुंगिएको थियो ।
मोरक्कोले सहआयोजक क्यानडालाई ३-० ले हराउँदै लगातार दोस्रो पटक क्वाटरफाइनल पुग्ने पहिलो अफ्रिकी राष्ट्रको कीर्तिमान बनायो । चार वर्षअघि कतार विश्वकपमा सेमिफाइनल पुगेको मोरक्कोले यसपटक पनि आफ्नो उत्कृष्ट प्रदर्शन कायम राखेको छ ।
साविक उपविजेता फ्रान्सले किलियन एमबाप्पेको निर्णायक पेनाल्टी गोलको मद्दतमा पाराग्वेलाई १-० ले पराजित गर्यो ।
सबैभन्दा ठूलो उलटफेर नर्वेले गर्यो । एर्लिङ हालान्डले अन्तिम समयमा लगातार दुई गोल गरेपछि ब्राजिल २–१ ले पराजित भयो । नर्वे पहिलो पटक विश्वकपको क्वाटरफाइनलमा पुगेको हो भने ब्राजिल ३६ वर्षपछि अन्तिम आठमा पुग्न असफल रह्यो ।
इंग्ल्यान्डले दश खेलाडीमा सीमित रहेर पनि सहआयोजक मेक्सिकोलाई ३-२ ले हराउँदै क्वाटरफाइनल यात्रा तय गर्यो ।
स्पेनले इन्जुरी समयमा मिकेल मेरिनोको गोलमा पोर्चुगललाई १-० ले हराउँदै अन्तिम आठमा स्थान बनायो । यससँगै क्रिस्टियानो रोनाल्डोको विश्वकप यात्रा पनि समाप्त भयो ।
अर्को खेलमा बेल्जियमले घरेलु समर्थकबीच खेलिरहेको अमेरिका माथि ४-१ को प्रभावशाली जित निकाल्दै क्वाटरफाइनलमा प्रवेश गर्यो ।
साविक विजेता अर्जेन्टिनाले इजिप्टविरुद्ध दुई गोलले पछि परेको अवस्था उल्टाउँदै ३-२ को शानदार पुनरागमन जित निकाल्यो । यसअघि पनि अर्जेन्टिनाले अन्तिम ३२ मा केप भर्डेलाई अतिरिक्त समयमा ३-२ ले हराएको थियो ।
अन्तिम प्रिक्वाटरफाइनलमा स्विट्जरल्यान्डले कोलम्बियालाई पेनाल्टी सुटआउटमा ४-३ ले हरायो । निर्धारित ९० मिनेट र अतिरिक्त समयमा गोलरहित बराबरी भएपछि खेलको निर्णय पेनाल्टीबाट भएको थियो ।
क्वाटरफाइनलको पहिलो खेलमा फ्रान्स र मोरक्को आमनेसामने हुनेछन् । यी दुई टोली २०२२ विश्वकपको सेमिफाइनलमा भिडेका थिए, जहाँ फ्रान्स २-० ले विजयी भएको थियो । यसपटक मोरक्को पुरानो हारको बदला लिने लक्ष्यमा हुनेछ ।
दोस्रो क्वाटरफाइनलमा स्पेन र बेल्जियम भिड्नेछन् । स्पेन १६ वर्षपछि विश्वकपको क्वाटरफाइनलमा पुगेको हो भने बेल्जियम आठ वर्षपछि अन्तिम आठमा फर्किएको छ ।
तेस्रो खेलमा पहिलो पटक क्वाटरफाइनल पुगेको नर्वेले १९६६ को विश्व विजेता इंग्ल्यान्डसँग प्रतिस्पर्धा गर्नेछ । हालान्डको उत्कृष्ट लयका कारण नर्वे यसपटक उपाधिको दाबेदारका रूपमा समेत हेरिएको छ ।
अन्तिम क्वाटरफाइनलमा साविक विजेता अर्जेन्टिनाले स्विट्जरल्यान्डको सामना गर्नेछ । ७२ वर्षपछि क्वाटरफाइनल पुगेको स्विट्जरल्यान्डले अर्को ठूलो उलटफेर गर्ने लक्ष्य राखेको छ भने अर्जेन्टिना ६४ वर्षपछि विश्वकप उपाधि रक्षा गर्ने पहिलो राष्ट्र बन्ने अभियानमा छ ।
गोल्डेन बुटको प्रतिस्पर्धा पनि निकै रोचक बनेको छ । अर्जेन्टिनाका कप्तान लियोनल मेसी ८ गोलसहित शीर्ष स्थानमा छन् । फ्रान्सका किलियन एमबाप्पे र नर्वेका एर्लिङ हालान्ड समान ७ गोलका साथ दोस्रो स्थानमा छन्। एमबाप्पेका नाममा दुई असिस्ट पनि छ ।
मेसीले खेलेका सबै पाँच खेलमा गोल गरेका छन् भने हालान्डले पनि प्रत्येक खेलमा गोल गर्ने दुर्लभ उपलब्धि कायम राखेका छन् ।
इंग्ल्यान्डका कप्तान ह्यारी केन ६ गोलसहित उनीहरूलाई पछ्याइरहेका छन् । क्वाटरफाइनलमा नर्वे र इंग्ल्यान्ड आमनेसामने हुने भएकाले हालान्ड र केनबीचको प्रतिस्पर्धा विशेष चासोको विषय बनेको छ । फ्रान्सका उसमान डेम्बेले र स्पेनका मिकेल ओयार्जाबाल ४-४ गोलसहित गोल्डेन बुटको दौडमा कायम छन् ।
फ्रान्स vs मोरक्को – असार २६, बिहान १:४५ बजे (बोस्टन स्टेडियम)
स्पेन vs बेल्जियम – असार २७, बिहान १२:४५ बजे (लस एन्जलस स्टेडियम)
नर्वे vs इंग्ल्यान्ड – असार २८, बिहान २:४५ बजे (मायामी स्टेडियम)
अर्जेन्टिना vs स्विट्जरल्यान्ड – असार २८, बिहान ६:४५ बजे (कान्सास सिटी स्टेडियम)
