बुटवल उपमहानगरपालिकाको आर्थिक सहयोगमा बुटवल–७ स्थित सिद्धार्थ बाल तथा महिला अस्पताल (आम्दा)मा निर्माण गरिएको पेडियाट्रिक वार्ड–एनेक्स–१ भवन अस्पताललाई हस्तान्तरण गरिएको छ ।
सोमबार आम्दा विज्ञान प्रतिष्ठान बुटवलको सभाहलमा आयोजित कार्यक्रममा बुटवल उपमहानगरपालिकाका नगर प्रमुख खेलराज पाण्डेयले अस्पतालका मेडिकल सुपरिन्टेन्डेन्ट डा. विनोद पराजुलीलाई नवनिर्मित भवन हस्तान्तरण गरेका हुन् ।
भवन हस्तान्तरण गर्दै नगर प्रमुख पाण्डेयले महिला तथा बालबालिकालाई विशिष्टीकृत स्वास्थ्य सेवा प्रदान गर्दै आएको आम्दा अस्पतालको सेवा विस्तार र स्तरोन्नतिमा उपमहानगरपालिकाको सहकार्य निरन्तर रहने बताए । स्थानीय सरकारको प्राथमिकतामा स्वास्थ्य क्षेत्र रहेको उल्लेख गर्दै उहाँले अस्पतालको पूर्वाधार विकाससँगै सेवा विस्तारमा पनि आवश्यक सहयोग गरिने बताए ।
त्यस्तै बुटवल उपमहानगरपालिकाकी उपप्रमुख सावित्रीदेवी अर्यालले महिला तथा बालबालिकाको स्वास्थ्यलाई प्राथमिकतामा राखेर अस्पतालको पूर्वाधार र सेवा विस्तारमा उपमहानगरपालिकाले सहयोग गर्दै आएको बताईन । अस्पतालको थप स्तरोन्नति तथा सेवाको गुणस्तर अभिवृद्धिका लागि आवश्यक सहकार्य गर्न उपमहानगरपालिका प्रतिबद्ध रहेको उनको भनाइ छ ।
अस्पताल स्थानीय व्यवस्थापन समितिका सदस्य जीवनप्रसाद वझाले आम्दा अस्पतालसँग बुटवल उद्योग वाणिज्य संघले सुरुदेखि नै सहकार्य गर्दै आएको उल्लेख गर्दै अस्पतालको प्रगतिमा संस्थागत साथ र सहयोग निरन्तर रहने बताए ।
अस्पतालका मेडिकल सुपरिन्टेन्डेन्ट डा. विनोद पराजुलीले नयाँ भवन निर्माण तथा हस्तान्तरण हुनु भौतिक पूर्वाधार थपिनु मात्र नभई स्थानीय सरकारले आमा तथा बालबालिकाको स्वास्थ्यलाई दिएको प्राथमिकताको प्रमाण भएको बताए । उनले भवन निर्माणका लागि सहयोग गरेकोमा बुटवल उपमहानगरपालिकाप्रति आभार व्यक्त गरे ।
भवन निर्माणसम्बन्धी विवरण प्रस्तुत गर्दै इन्जिनियर मोहराज पौडेलले पेडियाट्रिक वार्ड–एनेक्स–१ भवन ९२ लाख २२ हजार ७ सय २५ रुपैयाँ लागतमा निर्माण सम्पन्न भएको जानकारी दिए । भवन निर्माणका लागि उपमहानगरपालिका र अस्पतालबीच २०८२ असोज ६ गते सम्झौता भएको र निर्माण कार्य २०८३ असार ३२ गते सम्पन्न भएको उनले जानकारी गराए ।
कार्यक्रममा मेडिकल सुपरिन्टेन्डेन्ट डा. पराजुलीले नगर प्रमुख पाण्डेयलाई सम्मानपत्रसमेत प्रदान गरेका थिए । अस्पतालकी मेट्रोन कल्पना विश्वकर्माको स्वागत तथा एचआर देवप्रसाद खनालको सञ्चालनमा भएको कार्यक्रममा उपमहानगरपालिकाका कर्मचारी, अस्पतालका चिकित्सक, स्वास्थ्यकर्मी, कर्मचारी तथा सञ्चारकर्मीको सहभागिता थियो ।
बुटवल उपमहानगरपालिका, बुटवल उद्योग वाणिज्य संघ र आम्दा नेपालबीचको त्रिपक्षीय सम्झौता तथा सहकार्यमा सिद्धार्थ बाल तथा महिला अस्पताल २०५५ कात्तिक १६ गते स्थापना भएको हो । महिला तथा बालबालिकालाई प्राथमिकतामा राखेर सेवा सुरु गरेको अस्पतालमा हाल १३९ शय्या सञ्चालनमा छन् ।
अस्पतालले बालरोग, स्त्री तथा प्रसूति रोग, स्त्री क्यान्सर, सामान्य चिकित्सा, बालरोग शल्यचिकित्सा, आँखा, नाक–कान–घाँटी, हाड तथा नशा, दाँत तथा गिजालगायतका सेवा प्रदान गर्दै आएको छ । अस्पताल प्रशासनका अनुसार मधुमेह भएका २५ वर्षसम्मका व्यक्ति तथा थालासेमिया भएका बिरामीलाई निःशुल्क सेवासमेत प्रदान गरिँदै आएको छ ।
मेडिकल सुपरिन्टेन्डेन्ट डा. पराजुलीका अनुसार आर्थिक वर्ष २०८२/८३ मा अस्पतालबाट ४६ हजार ६ सय २३ जनाले ओपिडी, १४ हजार ३ सय ६४ जनाले आकस्मिक, ८ हजार ७ सय १९ जनाले भर्ना, १ हजार १ सय ४७ जनाले शल्यक्रिया, १ हजार ७ सय ४१ जनाले एनआइसियु तथा पिआइसियु र १ हजार २ सय ४४ जनाले प्रसूति सेवा लिएका छन् । अस्पतालमा रुपन्देही र आसपासका जिल्ला सहित सल्यान, रुकुम, प्युठान, स्याङ्जा, बागलुङलगायत १६ जिल्लाका साथै भारतका सीमावर्ती क्षेत्रबाट समेत उपचारका लागि आउने गरेका छन् ।
