बुटवलको सडक ८२ फुट बनाउने योजनाविरुद्ध घरधनी

बुटवलको सडक ८२ फुट बनाउने योजनाविरुद्ध घरधनी

butwalबुटवल/। सडक डिभिजन कार्यालय बुटवलले राजमार्ग चौराहादेखि गोलपार्कसम्मको सडकलाई ८२ फुट कायम गराउन थालेपछि घरधनी बेचैन भएका छन्
कार्यालयले सडकको दायरामा पर्ने घरमा चिह्न लगाउन थालेपछि घरधनी सडक विस्तारविरुद्ध मोर्चाबन्दीमा जुटेका हुन् । सडक डिभिजनले आफ्नो क्षेत्राधिकारभित्र बनेका संरचना हटाउन रातो चिह्न लगाउन थालेपछि उनीहरु विभिन्न व्यक्ति, राजनीतिक दल, सङ्घसंस्थासँग गुहार माग्न थालेका छन् । यसका लागि घरधनीले राजमार्ग चौराहा–गोलपार्क सहरी विकास सङ्घर्ष समिति गठन गरेका छन् । पचहत्तर फुट कायम भएको सडक हस्तान्तरण गर्न नपाउँदै फेरि ८२ फुट कायम गराउने नाममा व्यवसायीलाई उठिबास लगाउन थालेको भन्दै उनीहरुले मोर्चाबन्दी कसेका हुन् ।

बुटवल उद्योग वाणिज्य सङ्घले एक विज्ञप्ति जारी गरी तत्काल सडक क्षेत्रका घर नहटाउन आग्रह गरेको थियो । सङ्घले विज्ञप्ति जारी गरेसँगै घरधनीको भेलाले सङ्घर्ष समिति गठन गरेको हो । बुटवलको तीन किलोमिटर सडक किनारका व्यापारी तथा घरधनी सङ्गठित रुपमा सडक विस्तारविरुद्ध लागेका हुन् । बुटवलको एक होटलमा भएको घरधनीको भेलाले दधिराम खरेलको संयोजकत्वमा सङ्घर्ष समिति गठन गरेको छ । यसको उपाध्यक्षमा डा प्रायश्चित श्रेष्ठ, सचिवमा किशोरकुमार विश्वकर्मा र कोषाध्यक्षमा हरिप्रसाद पोखरेल रहनुभएको छ । खरेल पश्चिम नेपाल बस व्यवसायी समिति र श्रेष्ठ लुम्बिनी अञ्चल अस्पतालका अध्यक्ष हुनुहुन्छ ।

त्यस्तै सदस्यहरुमा रामेश्वर श्रेष्ठ, कुलचन्द्र गौतम, गोपाल पाण्डे, सूर्यबहादुर मल्ल, चन्द्रा न्यौपाने, सञ्जय गुप्ता, हाजी खानउल्लाह मियाँ, प्रेमसिंह क्षेत्री र रवीन्द्रनाथ पँगेनी रहनुभएको छ । बुटवलको राजमार्ग चौराहादेखि गोलपार्कसम्मका तीन सयभन्दा बढी घर सडकको क्षेत्रमा परेका छन् । यसमा डिभिजन सडक कार्यालयले दायाँबायाँ रातो चिह्न लगाएको छ । सङ्घर्ष समितिका संयोजक खरेलले बुटवल क्षेत्रको सडक ८२ फुट बनाउन आवश्यक नभएको दाबी गर्नुहु्न्छ । “बुटवलको चौराहादेखि गोलपार्कसम्मको क्षेत्र हाइवे होइन, बजार क्षेत्र हा,े” उहाँले भन्नुभयो – “यसलाई ८२ फुट कायम गर्न आवश्यक छैन ।”

सडक डिभिजन कार्यालय बुटवलका प्रमुख मेघराज मरासिनीले दुई चारजना व्यक्ति सङ्गठित हुँदैमा आफूहरुको काममा कुनै असर नपर्ने बताउनुभयो । “कसैको घर भत्काएर सडक बनाउने हाम्रो योजना होइन,” उहाँले भन्नुभयो – “हाम्रो आफ्नो जग्गा सफा गरेर राख्ने मात्र हो ।” कार्यालय आफ्नो योजनाबाट पछाडि नहट्ने उहाँले प्रस्ट पार्नुभयो । मरासिनीले तिहारलगत्तै कार्यालयले आफ्नो सडक सफा गर्न सुरु गर्ने बताउनुभयो । कार्यालयले सडक क्षेत्रभित्र परेका घरमा चिह्न लगाउने काम अन्तिम चरणमा पु¥याएको छ ।

समितिका उपाध्यक्ष तथा लुम्बिनी अञ्चल अस्पतालका अध्यक्ष श्रेष्ठले बुटवल क्षेत्रबाट हाइवे नहुने हुँदा यस क्षेत्रको सडकलाई विस्तार गरी ८२ फुट कायम गर्न आवश्यक नभएको बताउनुभयो । “मैले घर बनाउने बेलामा ८२ फुट कहाँसम्म पर्छ चिह्न लगाइदिनु प¥यो भन्दा सडकका जिम्मेवार व्यक्तिले ७५ फुट छोेडेर बनाए हुन्छ भनेका थिए,” उहाँले भन्नुभयो – “अहिले आएर ८२ फुट कायम गर्न खोज्ने ?”

पुष्पलाल पार्कमा रहेको नेपाल कम्युनिटी डेभलपमेन्ट बैंक भएको घर श्रेष्ठको हो । सडक विभागले देशभरका मुख्य सडकलाई ८२ फुट कायम गर्न थालेको छ । सोही अनुसार बुटवलको सडक पनि ८२ फुट बनाउन लागिएको हो । यो सडक सिद्धार्थ राजमार्गअन्तर्गत पर्छ । बुटवल–भैरहवा ६ लेन सडन निर्माण गर्दा पनि विभिन्न स्थानमा व्यवसायीको अवरोध भए पनि त्यसको कुनै प्रवाह नगरी कार्यालयले सडक विस्तार निर्माण कार्य चालु राखेको छ । रासस

Share This
  •  
  •  
  •  
  •  
  •  
  •  
  •  
  •  
  •  
  •