शाइन रेसुङ्गा नवौं वर्षमा

605

शाइन रेसुङ्गा नवौं वर्षमा

बुटवल, ११ फागुन । शाइन रेसुङ्गा डेभलपमेण्ट बैंक लिमिटेड नवौं वर्षमा प्रवेश गरेको छ । बार्षिकोत्सवको अवसरमा बैंकले स्टेकहोल्डर्स संग भेटघाट कार्यक्रम गरि बैंकको वर्तमान अवस्था, बैंकको भावी कार्यक्रम प्रस्तुत गरेको छ ।

राष्ट्रियस्तरको विकास बैंकमा स्तरोन्नती, बुटवल उपमहानगरपालिकाको कालिकानगरमा आफ्नो अत्याधुनिक भवन निर्माण गरि उक्त भवनमा केन्द्रीय कार्यालयको संचालन तथा वित्तीय साझरता अभिबृद्धि गर्दे यस क्षेत्रको रोजाईको बैंक वन्ने प्रतिबद्धता व्यक्त गरेको छ । सवल, सुदृढ र विश्वसनीय बैंकको रुपमा रहेको पहिचानलाई कायम राख्दै सम्पूर्ण स्टेकहोल्डर्सको हितमा बैंकलाई अगाडी बढाउने जनाएको छ ।

१० जिल्ला कार्यक्षेत्र रहेको बैकको २७ शाखा कार्यालय तथा २ वटा एक्सटेन्सन काउण्टर मार्फत वित्तीय सेवा प्रदान गरिरहेको छ भने बैंकका अधिकांश शाखा कार्यालयहरु ग्रामिण क्षेत्रमा रहेको र बैंकिङ्ग सुविधा पहुंचमा बैंकले अत्यन्त जोड दिएको जनाएको छ ।

चुक्ता पूँजी १ अर्व १० करोड रहेको यस बैंकको २०७३ पुस मसान्तमा निक्षेप परिचालन ९ अर्व २० करोड, कर्जा लगानी ८ अर्व १७ करोड र सञ्चालन मूनाफा २६ करोड ८ लाख रहेको छ भने करिव १ लाख ३० हजार भन्दा ग्राहक संख्या रहेको बैंकका प्रमुख कार्यकारी अधिकृत प्रकाश पौडेलले बताउनुभयो ।
बैंकले ग्रीन सिटि क्लिन सिटि भन्ने नाराकासाथ बुटवलमा सरसफाई कार्यक्रम गर्नुका साथै नयां बसपार्क देखि मिलनचोकसम्मको रोड डिभाइडरमा रोटरी क्लव अफ बुटवल साउथसंगको सहकार्यमा बृक्षरोपण गर्नुका साथै उक्त बृक्षरोपणको संरक्षण गर्ने जनाएको छ ।