सुनसरीका घटनामा तीनको मृत्यु

1K

सुनसरीका घटनामा तीनको मृत्यु

sunsariइटहरी, १४ कात्तिक । सुनसरी जिल्लाको विभिन्न स्थानमा भएका घटनामा तीनजनाले ज्यान गुमाएको जिल्ला प्रहरी कार्यालय सुनसरीले जनाएको छ ।

प्रहरीका अनुसार सुनसरी जिल्लाको पाँचकन्यास्थित पाँचकन्या रिसोर्टमा कार्यरत ७२ वर्षीय नरबहादुर राई तीन दिनदेखि हराइरहेका अवस्थामा खोजतलास गर्ने क्रममा सोही रिसोर्ट नजिकै मृत अवस्थामा फेला परेका छन् ।

यसैगरी इटहरी उपमहानगरपालिका–१५ निवासी युवराज श्रेष्ठको १० वर्षीया छोरी स्वस्तिका श्रेष्ठ र धरान २३ की ६४ की विष्णुमाया भुजेलले आ–आफ्नै घरको कोठामा झुन्डिएर आत्महत्या गरेको पनि प्रहरीले जानकारी दिएको छ ।

यस्तै जिल्लाको दक्षिणी गाविस तनमुना–७ निवासी बङ्करलाल माझीको घरमा विद्युत् चुहिएर आगलागी हुँदा माझीसहित उनको घर आसपासमा रहेका रक्सु माझी र कलकतु माझी घर तथा गाईगोठ जलेको छ । आगलागीबाट केही चौपायासहित छ लाखभन्दा बढी मूल्यको धनमाल नोक्सानी भएको जिल्ला प्रहरी कार्यालयले जानकारी दिएको छ ।

राति भएको आगलागीको क्षतिको यकिन विवरण लिने कार्य भइरहेको बताइएको छ । रासस