चाडपर्वका नाममा हुने भडक हटाऔं : सभामुख घर्ती

400

चाडपर्वका नाममा हुने भडक हटाऔं : सभामुख घर्ती

बुटवल, १० भदौ । प्रदेश पाँचका सभामुख पुर्णबहादुर घर्तीले चाडपर्वका नाममा हुने अनावश्यक भडक तथा गहना र कपडाको प्रदर्शनलाई निस्तेज गर्नु पर्ने बताउनु भएको छ । बिकृतिको रुपमा भित्रिएको अनावश्यक तडक भडक तथा गहना र कपडाको प्रदर्शनलाई निरुत्साहित गर्ने गरी चाड पर्व मनाउनु पर्ने उहाँले बताउनु भयो ।
हिन्दु नेपाली महिलाहरुको महान चाड हरितालिका तीजको अवसरमा मंगलबार प्रदेशसभा सचिवालयद्वारा आयोजित तीज मिलन तथा शुभकामना आदान–प्रदान कार्यक्रममा बोल्दै सभामुख घर्तीले तीज पर्वका नाममा हुने अनावश्यक तडक भडक तथा गहना र कपडाको प्रदर्शन गर्न छोड्ने हो भने तीजको महत्व अझ बढेर जाने बताउनु भयो ।
परम्परागत, धार्मिक र सांस्कृतिक महत्वका अलवा चाडपर्वलाई मुलुकमा प्रजातन्त्र प्राप्तिको आन्दोलनमा समेत उपयोग हुदै आएको स्मरण गर्दै उहाँले बिकृतिको अन्त्य गर्दै संस्कृतिको जगेर्ना गर्ने गरी पर्वलाई मनाउनु पर्ने आवस्यकता औल्याउनु भयो ।
सभामुख घर्तीले कम्तिमा पनि तीज पर्व नसकिदा सम्म महंगा कपडा र गरगहना प्रदर्शन नगर्न समेत प्रदेशसभाका महिला सदस्यहरुलाई आग्रह गर्नु भयोे ।
प्रदेशसभाकी उपसभामुख कृष्णी थारुको सभापतित्वमा भएको कार्यक्रममा प्रदेश सरकारका भौतिक पूर्वाधार विकास मन्त्री बैजनाथ चौधरी, भूमि व्यवस्था, कृषि तथा सहकारी मन्त्री आरती पौडेल, प्रदेश मामिला तथा कानून समिति सभापति दामाकुमारी शर्मा, कृषि, वन तथा वातावरण समितिका सभापति विजयबहादुर यादव, नेकपा संसदीय दलका प्रमुख सचेतक भुमिश्वर ढकाल, नेपाली काँग्रेस सचेतक निर्मला क्षेत्री, राष्ट्रिय जनता पार्टीकी प्रदेशसभा सदस्य कल्पना पाण्डे, राष्ट्रिय जनमोर्चाकी प्रदेशसभा सदस्य तारा जिसी, नेपाली कांग्रेस प्रदेशसभा सदस्य रमा अर्याल, प्रदेशसभा सचिवालयका कानून अधिकृत सिता घिमिरे लगायतले तीज पर्वको मौलिकता र बिशेषता रहेकोले पर्वका नाममा भित्रिएका बिकृतिहरुको अन्त्य गर्नुपर्ने र तीजको मौलिकता कायम गर्नुपर्ने धारणा राख्नु भएको थियो ।