गहुँको बिऊमा किसानलाई ४० प्रतिशत अनुदान

गहुँको बिऊमा किसानलाई ४० प्रतिशत अनुदान

मणिग्राम, २८ कात्तिक । रुपन्देहीको तिलोत्तमा नगरपालिकामा गहुँको बिऊ वितरण सुरु भएको छ । नगरको वार्षिक स्वीकृत कार्यक्रम अनुसार बिहीबारबाट ४० प्रतिशत अनुदानमा किसानलाई गहुँको बिऊ वितरण सुरु गरिएको हो ।
नगरपालिकाले गत वर्ष पनि गहुँको बिऊमा ४० प्रतिशत अनुदान दिएको थियो । किसानलाई प्रोत्साहन गर्दै कृषि उत्पादकत्व वृद्धि गर्ने नीतिअनुसार गहुँको बिऊमा अनुदान दिइएको नगर प्रमुख बासुदेव घिमिरेले बताउनुभयो । किसानबाट माग परिमाण संकलन गरेर भलबारी दल्का स्थित कृषि सेवा केन्द्रमार्फत् बिऊ वितरण गरिएको हो ।
नगरपालिकाले यसअघि सूचना जारी गरी आफूलाई चाहिने गहुँको बिऊको विवरण वडा कार्यालयमा टिपाउन किसानलाई जानकारी गराएको थियो । नगरपालिकाले भृकुटी, आदित्य, विजय, एनएल, गौतम जातको उन्नत जातको गहुँको बिऊ उपलब्ध गराएको हो ।
बिहीबार भलबारी स्थित कृषि सेवा केन्द्रमा नगर प्रमुख बासुदेव घिमिरेले वडा नं. ११ मृगौलीका किसान विश्राम कुँवर र रामलगन यादवलाई एक÷एक बोरा बिउ उपलब्ध गराएर वितरण कार्य सुरु गर्नुभयो । गहुँ वितरणको व्यवस्थापन कृषि शाखा र कृषि व्यवसाय प्रवद्र्धन समितिको सहकार्यमा भएको छ । गत वर्ष ५२ मेट्रिक टन गहुँको बिऊ वितरण गरिएकोमा यस वर्ष १४५ मेट्रिक टन माग रहेको नगरपालिकाका प्रवक्ता सुरेन्द्र श्रीले जानकारी गराउनु भयो ।
नगर उप–प्रमुख जागेश्वरी चौधरीले बिऊको सदुपयोग गरी कृषि उत्पादन बढाउन किसानलाई आग्रह गर्नुभयो । गत वर्ष अनुदानमा उन्नत जातको बिऊ दिएकाले गहुँको उत्पादन २० प्रतिशतले बढेको कृषि शाखा अधिकृत जीवन आचार्यले जानकारी गराउनु भयो । तिलोत्तमाको वडा नं. १३, १४, १६, १७ मा गहुँको उत्पादन बढी हुने गरेको छ । कार्यक्रम वडा नं. ७ का कार्यवाहक अध्यक्ष देवीलाल पंगेनीको अध्यक्षतामा भएको हो ।

Share This
  • 6
  •  
  •  
  •  
  •  
  •  
  •  
  •  
  •  
  •  
    6
    Shares