कपिलवस्तुको शुद्धोधन गाउपालिकामा रहेको नेपाल राष्ट्रिय माध्यमिक विद्यालय नमुना विद्यालयको रुपमा छनोट भएको छ । नेपाल सरकार शिक्षा विज्ञान तथा प्रविधि मन्त्रालय, शिक्षा मानव विकास केन्द्र अन्तर्गतको विद्यालय शिक्षा मापदण्ड निर्धारण शाखाले शुद्धोधन गाउपालिका ४ औरहिया मुडफुटुवा स्थित नेपाल राष्ट्रिय माध्यमिक विद्यालय नमुना विद्यालयको रुपमा छनोट गरेको हो ।
केन्द्रबाट आर्थिक बर्ष २०७६÷०७७ मा नमुना विद्यालयका लागि आवेदन भरेको यस विद्यालयले आवश्यक मापदण्ड पुरा गरेका कारण नमुना विद्यालयका रुपमा छनोट हुन सफल भएको विद्यालयका प्राचार्य लालचन्द्र पाण्डेले बताउनुभयो ।
विद्यालयको भौतिक संरचना र कक्षा कोठा व्यवस्थापन शिक्षण सिकाई गर्न ट्रेनिङ हल, अडिटोरियम हल, संगीत प्रशिक्षण कक्ष, विज्ञान प्रयोगशाला, पुस्तकालय, सूचना तथा सञ्चार ल्याब, चमेना गृह, प्राथमिक उपचार कक्ष र छात्र छात्राको अलग शौचालय लगायतकोे भौतिक पुर्वाधारलाई मापदण्ड बनाई नमुना विद्यालय घोषणा गरिएको हो । त्यस्तै इन्डोर र आउटडोर खेलमैदान , विद्यालयमा सुविधा सम्पन्न पुस्तकालय, इ–लाइब्रेरी, इन्टरनेट सहित कम्प्यूटर, फोटोकपी मेसिन, बिषयगत र अन्तर बिषय पुस्तकहरु, पत्रपत्रिका भएको हुनुपर्ने मापदण्ड रहेको छ । सो मापदण्ड विद्यालयले पुरा गरी नमुना विद्यालय घोषणा भएको हो ।
नेपाल राष्ट्रिय माविमा हाल कक्षा १ देखि १२ सम्म १ हजार ६ सय ५० जना विद्यार्थी अध्यानतरत रहेका छन् । कक्षा १ देखि ५ सम्म अग्रेजी र नेपाली दुवै माध्ययममा समेत अध्यायापन गराउदै आएको उक्त सामुदायिक विद्यालयले प्राविधिक तह तर्फ डिप्लोमा ईन सिभिल ईन्जीनियररिङ्ग र जियोमेटिक्स विषयमा समेत अध्ययापन हुदै आएको विद्यालयले जनाएको छ । विद्यालयका प्रअका अनुसार प्राविधिक तर्फ २० जिल्लाका विद्यार्थीले अध्ययन गर्दै आएका बताउनु भयो । उहाँले ८ कोठाको छात्राबास बनिसकेको र थप १२ कोठा थप्ने, प्राबिधिक बिषय अर्को थप गर्ने, जिवन उपयोगी सीप अनिवार्य सिकाउने, सबै भन्दा अनुसासित बतावरण तैयार पार्ने , शिक्षकले आफ्ना छोरा छोरीलाई निजि विद्यालयमा पढाउन नपाइने, जिल्लाभरको विद्यालयको भन्दा धेरै विद्यार्थी संख्या बनाउने,क्रमशः १२ कक्षा सम्म नै अंग्रेजी र नेपाली दुवै माध्यम बाट पढाउने लगायतका योजनाहरु रहेको बताउनु भयो ।
आर्थिक बर्ष २०७६÷०७७ मा विगतमा नमुना विकासका लागि विद्यालयहरु छनोट नभएका स्थानीय तह अन्तर्गत १ सय ओटा विद्यालयहरु नमुना विकासका लागि छनोट गर्न आहवान गरिएको थियो । जस अनुसार नेपाल राष्ट्रिय माविले पनि आवदेन भरेको थियो । शिक्षा, विज्ञान तथा प्रविधि मन्त्रालयले देशभर १ हजार नमुना विद्यालय बनाउने लक्ष्य राखेको छ । विद्यालय क्षेत्र विकास योजना अन्तर्गत मन्त्रालयले सन् २०२२ सम्ममा १ हजार नमुना विद्यालय बनाउने लक्ष्य लिएको हो । मन्त्रालयले प्रदेश सरकार मातहतमा नमुना विद्यालय सञ्चालन गर्ने तयारी समेत गरेको छ । जसमा एक स्थानीय तह एक नमुना विद्यालय हुनुपर्नेछ ।
