सचिवालय बैठकलाई चुनौती दिँदै प्रधानमन्त्रीले एकै समयमा बोलाए मन्त्रिपरिषद् बैठक

1.3K

सचिवालय बैठकलाई चुनौती दिँदै प्रधानमन्त्रीले एकै समयमा बोलाए मन्त्रिपरिषद् बैठक

बुधबारका लागि तोकिएको सत्तारुढ नेकपा सचिवालय बैठकलाई चुनौती दिँदै प्रधानमन्त्री केपी शर्मा ओलीले मन्त्रिपपरिषद् बैठक बोलाएका छन् ।
प्रधानमन्त्रीले मंगलबार राति अबेर बुधबार दिउँसो १ बजेका लागि मन्त्रिपरिषद् बैठक बोलाएका छन् । पाँच दिनअघि बसेको सचिवालय बैठकले पनि सोही समयमा बैठक निधो गरेको थियो ।

प्रधानमन्त्री तथा मन्त्रिपरिषद् कार्यालयका अनुसार राति पौने १० बजे मन्त्रिपरिषद् बैठक तय भएको हो । ‘हामी बिदामा थियौं,’ प्रधानमन्त्री तथा मन्त्रिपरिषद् कार्यालयका एक उच्च अधिकारीले भने, ‘साढे ९ बजे सबै मन्त्रीहरुलाई जानकारी दिनु भनेर खबर गर्न भनियो ।’ प्रायजसोः साँझ हुँदै आएको मन्त्रिपरिषद् बैठक बुधबार भने दिउँसो १ बजे नै बोलाइएको छ ।

नेकपा सचिवालय बैठक सार्न अध्यक्षसमेत रहेका प्रधानमन्त्री ओलीको प्रस्तावमा दाहाल सहमत नभएपछि सोही समयमा मन्त्रिपरिषद् बैठक बोलाइएको हो । मन्त्रिपरिषदमा प्रधानमन्त्रीसहित सचिवालय सदस्यहरु महासचिव विष्णु पौडेल, ईश्वर पोखरेल र रामबहादुर थापा मन्त्री छन् ।
बैठक रोक्न भन्दै ओलीको सन्देश लिएर महासचिव विष्णु पौडेल मंगलबार दिउँसो कार्यकारी अध्यक्ष पुष्पकमल दाहाल ‘प्रचण्ड’लाई भेट्न खुमलटार पुगेका थिए । तर, दाहालले अस्वीकार गरे । दाहालले पौडेलसँग मात्रै होइन, राष्ट्रपति विद्यादेवी भण्डारीलाई भेटेर बैठक नरोक्ने जनाउ दिइसकेका छन् ।

दाहालसहित सचिवालयका पाँच नेताको मागमा चार दिनअघि बसेको बैठक ‘तनावपूर्ण’ भएपछि ३ मंसिरसम्म स्थगित भएको थियो । गएको बैठकमा दुई अध्यक्षबीच आदानप्रदान भएका चार पत्र र दाहालको राजनीतिक प्रस्ताव अध्ययनका लागि उपलब्ध गराइएको थियो । नेताहरुलाई उपलब्ध गराएको पत्र सार्वजनिक सञ्चारमाध्यममा हुबहु प्रकाशित भइसकेका छन् ।

दुई नेताबीचको पत्रभन्दा पनि दाहालको प्रस्तावमा ओलीको गहिरो चित्त दुखाइ छ । दाहालको प्रस्तावमा आफूमाथि निराधार आरोप लगाएको भन्दै उनी क्रुद्दमात्रै भएका छैनन्, प्रस्ताव फिर्ता नभएसम्म बैठक नबस्ने र आफू सहभागी नहुने सन्देश दूतहरुमार्फत पठाइसकेका छन् ।