कांग्रेस महाधिवेशनको उद्घाटन समारोह रंगशालामा

341

कांग्रेस महाधिवेशनको उद्घाटन समारोह रंगशालामा

 

काठमाडौं । नेपाली कांग्रेसको आसन्न १३ औं महाधिवेशनको उद्घाटन समारोह राजधानीस्थित दशरथ रङगशालामा हुने भएको छ ।congress-flagआउँदो फागुन २० गतेदेखि सुरु हुने पार्टीको महाधिवेशनको उद्घाटन सत्र दशरथ रङगशालामा गर्नेगरी रङगशाला बुकिङ गरिसकिएको महाधिवेशन व्यवस्थापन समितिका संयोजक तथा नेपाली काँग्रेस काठमाडौंका जिल्ला सभापति भीमसेनदास प्रधानले जानकारी दिए ।

१२ औं महाधिवेशन खुलामञ्चमा गरिएपनि यसपटक भने खुलामञ्चमा भूकम्पका कारण भत्किएका भौतिक संरचनाका अवशेष थुप्र्याइएकाले रङगशालामा गर्नुपरेको उनले बताए । रङगशालामा महाधिवेशन उद्घाटन समारोह भएपछि बन्दसत्र भने भृकुटीमण्डपमा गरिने सम्भावना छ ।

‘भृकुटीमण्डपमा का+ग्रेस महाधिवेशनको बन्दसत्र गर्ने भनेर बुकिङ त गरिसकिएको छ, तर त्यहाँको साउण्ड सिस्टम राम्रो नभएकाले त्यसको विकल्पको खोजी पनि भइरहेको छ, उनले भने । नेता प्रधानले दशरथ रङशालामै राम्रो खालको टेण्ट टाँगेर गर्ने की भन्नेबारेमा पनि छलफल भइरहेको बताए  । यसअघि एमालेको महाधिवेशनमा पनि बन्दसत्र भृकुटीमण्डपमै भएको थियो ।

आगामी फागुन २० उद्घाटन गरी २३ गतेसम्म सञ्चालन हुने महाधिवेशनको तयारीका लागि विभिन्न चरणमा छलफल तथा परामर्श पनि भइरहेको व्यवस्थापन समितिका संयोजक प्रधानले बताए । काँग्रेसको महाधिवेशनका लागि केन्द्रीय समितिले १३ वटा समिति बनाएको छ । रासस