मदानेका अध्यक्ष कुवँरले गरे क्यान्सर ग्रसित मायाँको उपचारमा आर्थिक सहयोग

1.3K

मदानेका अध्यक्ष कुवँरले गरे क्यान्सर ग्रसित मायाँको उपचारमा आर्थिक सहयोग

गुल्मीको मदाने गाउँपालिकाका अध्यक्ष महेन्द्रबहादुर कुवँरले आफूले गाउँपालिकाबाट पाउने सेवा सुविधाबाट स्तन क्यान्सर रोगबाट ग्रसित वडा नं. ७ निवासी मायाँ नेपालीलाई आर्थिक सहयोग प्रदान गर्नुभएको छ ।
भरतपुरको विपि कोईराला क्यान्सर अस्पतालमा उपचाररत मदाने गाउँपालिका वडा नं. ७ की २२ वर्षीय नेपालीलाई गाउँपालिकाका अध्यक्ष कुवँर, वडा नं. ७ का वडा अध्यक्ष सन्तोष केसी र नेपाली काँग्रेस मदाने गाउँपालिकाका सचिव राजेन्द्र विष्ट बुधबार अस्पतालमा पुगेर उपचारको लागि ४० हजार रुपैंया आर्थिक सहयोग प्रदान गर्नुभएको हो ।
क्यान्सर रोगबाट ग्रसित नेपाली तीन महिनादेखि विपि कोईराला क्यान्सर अस्पतालमा उपचाररत हुनुहुन्छ । ६ महिनाको छाराकी आमा मायाँलाई सुत्केरी भएपछि स्तन क्यान्सर देखिएको थियो । नेपाली परिवारको आर्थिक अवस्था एकदम कमजोर रहेको र उपचारमा केही भएपनि सहयोग होस् र अरुलाई पनि सहयोग गर्न सन्देश दिनको लागि गाउँपालिका अध्यक्ष आफै अस्पतालमा पुगेर आर्थिक सहयोग गरिएको वडा अध्यक्ष केसीले बताउनु भयो ।
गाउँपालिका अध्यक्ष कुवँरले आफूले गाउँपालिकाबाट प्राप्त गर्ने सेवा सुविधा सिधै पार्टीको खातामा जानेगरी व्यवस्था गर्नुभएको छ । त्यसरी खातामा गएको पैसा पार्टी समितिले निर्णय गरेर खर्च गर्ने व्यवस्था अनुसार समितिको निर्णयमा स्तन क्यान्सरकी बिरामी नेपालीलाई सहयोग गरिएको अध्यक्ष कुवँरले बताउनु भयो ।
अस्पतालमा उपचाररत विरामीको स्वास्थ्यमा सुधार भएको र निको हुनेमा आफू आशावादी रहेको उहाँको भनाई छ । उहाँले मायाँको उपचारमा सहयोग प्रदान गर्नको लागि अरु सहयोगी हातहरुलाई पनि आग्रह गर्नुभयो ।