बुटवलमा रहेको नेपालकै पहिलो स्कुटल कलेज वेष्टर्न मेगा कलेजले प्रदेश स्तरीय पौडी प्रतियोगिता आयोजना गरेको छ । बुटवल उपमहानगरपालिका वडा नं. १५ ढवाहामा रहेको कलेजले शुक्रबार पत्रकार सम्मेलन गरेर यहि असारको ११ र १२ गते पौडी प्रतियोगिता गर्न लागिएको जानकारी गराएको हो ।
पत्रकार सम्मेलनमा कलेजका अध्यक्ष मेघराज पन्थले कलेजले आयोजना गरेको प्रतियोगितामा प्रदेश भित्रका प्लस टु दिएर बसेका बिद्यार्थीलाई सहभागि हुन आग्रह गर्नुभयो । उहाँले सीपसंग जोडेर प्रदान गरिने शिक्षाले शिक्षासंगै रोजगारीको समेत अवसर प्रदान गर्ने भएकाले सीपमुलक शिक्षा कार्यक्रम सञ्चालन गरिएको जानकारी गराउनु भयो । उहाँले अव निकट भविश्यमा कलेजमा सूचना प्रविधिको क्षेत्रमा समेत पठनपाठनको तयारी भईरहेको पनि जानकारी गराउनु भयो ।
पौडी प्रतियोगिताका विजेतालाई १५ हजार रुपैंया र उपविजेतालाई १० हजार रुपैंया नगद पुरस्कार प्रदान गरिने कलेजका प्रिन्सिपल अधिवक्ता किसु शर्माले जानकारी गराउनु भयो । प्रतियोगितामा लुम्बिनी प्रदेशभरीका प्लस टु दिएर बसेका विद्यार्थी सहभागि हुन पाउने छन् । त्यसको लागि असारको ७ गते भित्रै नाम दर्ता गराउनु पर्ने छ । पौडी प्रतियोगितामा पहिले दर्ताको आधारमा १ सय जना विद्यार्थीलाई प्रतिस्पर्धा गराईने छ ।
त्यस्तै असारको दोस्रो साता राष्ट्रिय स्तरको निःशुल्क एक हप्ते होटल व्यवस्थापन तालिम कार्यक्रम गर्न लागिएको छ । असारको १६ गतेदेखि सञ्चालन हुने बेकरी तथा किचन, वारिष्टा तथा फूड एण्ड बेभरेज तथा अतिथ्यता सत्कार तथा हाउसकिपिङ तालिममा सहभागि हुन चाहनेले १२ गते भित्रै नाम दर्ता गरिसक्नुपर्नेछ । तालिममा सहभागि हुनको लागि जुनसुकै विषयमा प्लस टु दिएर बसेको हुनुपर्नेछ । सहभागिलाई निःशुल्क तालिम, निशुल्क पौडी र प्रमाण पत्र प्रदान गरिनेछ ।
होटल व्यवस्थापनमा पश्चिम क्षेत्रकै पहिलो कलेज वेष्टर्न मेगाले बिद्यार्थीलाई पठनपाठन संगै मानसिक शारीरिक तथा वौद्धिक विकासका कार्यक्रम सञ्चालन गर्दै आएको छ । सोही अनुसार शुक्रबार मानसिक स्वास्थ्य समस्या पहिचान तथा निराकरणका उपायका विषयमा विद्यार्थीलाई प्रशिक्षण तथा अन्तरक्रिया कार्यक्रम गरिएको कलेजका प्रिन्सिपल अधिवक्ता किसु शर्माले बताउनु भयो । कार्यक्रममा मानसिक स्वास्थ्य रोग विशेषज्ञ डा. विक्रम काफ्ले र मनोपरामर्शदाता यशोदा वगालेले प्रशिक्षण गर्नुभएको थियो । उक्त कलेजमा ४ वर्षे वि.एच.एम. र एमविए पठनपाठन हुँदै आएको छ ।
