बुटवलमा रहेको सिद्धार्थ बाल तथा महिला अस्पताल आम्दालाई मेडिकल कलेज बनाउन तयारी भएको छ । इन्डोनेशियाको बालीमा हुने आम्दा इन्टरनेशनलको अन्तर्राष्ट्रिय सभामा बुटवलको सिद्धार्थ बाल तथा महिला अस्पताल आम्दालाई मेडिकल कलेज बनाउने गरी प्रस्ताव लैजान लागिएकाे छ ।
जसका लागि बुटवलमा रहेको स्थानीय व्यवस्थापन समिति र आम्दा नेपालले निर्णय गरिसकेका छन् । २३ राष्ट्रमा सञ्जाल रहेको आम्दा इन्टरनेशनलको सभाले अनुमोदन गरेपछि बुटवलमा आम्दा इन्टरनेशनल मेडिकल कलेज बन्ने प्रक्रिया शुरु हुनेछ ।
आम्दा बुटवलको स्थानीय व्यवस्थापन समितिका अध्यक्ष तथा बुटवल उपमहानगरपालिकाका प्रमुख खेलराज पाण्डेयको अध्यक्षता र आम्दा इन्टरनेशनलका अध्यक्ष डा सिगेरु सुगानामीको उपस्थितिमा बुधबार बसेको बैठकले बुटवलमा आम्दा इन्टरनेशनल मेडिकल कलेज स्थापनाका लागि प्रक्रिया अगाडि बढाउने निर्णय गरेको हो ।
जसका लागि स्थानीय व्यवस्थापन समितिका अध्यक्ष तथा बुटवल उपमहानगरपालिकाका प्रमुख खेलराज पाण्डेयको संयोजकत्वमा ५ सदस्यीय कार्यदल बनाइएको छ । कार्यदलको सदस्यमा आम्दा इन्टरनेशनलका प्रतिनिधि अर्चना जोशी, आम्दा नेपालका अध्यक्ष डा. सुनु दुलाल, बुटवल उद्योग वाणिज्य संघका अध्यक्ष हरिप्रसाद अर्याल र आम्दा अस्पतालका मेडिकल सुपरिन्टेन्डेन्ट डा विनोद पराजुली सदस्य सचिव रहनु भएकाे छ ।
आम्दा इन्टरनेशनलको सहकार्यमा स्तरोन्नति भइरहेको अस्पताललाई थप व्यवस्थित गर्दै जनशक्ति उत्पादन र उपचारलाई सँगै अगाडि बढाउन मेडिकल कलेजका रुपमा अगाडि बढाउन लागिएको स्थानीय व्यवस्थापन समितिका अध्यक्ष तथा बुटवल उपमहानगरपालिकाका प्रमुख खेलराज पाण्डेयले बताउनुभयाे ।
उहाँले आम्दा अस्पताललाई यस क्षेत्रकै सुविधासम्पन्न अस्पताल र स्वास्थ्य क्षेत्रको जनशक्ति उत्पादन गर्ने कलेजका रुपमा स्थापित गर्ने योजना अनुसार अस्पताललाई मेडिकल कलेजका रुपमा स्तरोन्नति गर्नका लागि सम्भाव्यता अध्ययन गर्ने र बाँकी प्रक्रियाहरु पूरा गर्दै जाने गरी तयारी भएको बताउनु भयाे ।
यस्तै बुधबार नै आम्दा इन्टरनेशनलका अध्यक्ष डाक्टर सुगेरु सुगानामीले आम्दा नेपाल सिद्धार्थ बाल तथा महिला अस्पतालको सेवाप्रवाहबारे अनुगमन गर्नुभएकाे छ । आम्दा नेपालका अध्यक्ष डाक्टर सुनु दुलाल, आम्दा जापानका कार्यक्रम निर्देशक अर्चना जोशी र आम्दा नेपालका परियोजना निर्देशक सुरेश रेग्मी सहितको टोलीले अस्पतालको सेवाबारे अनुगमन गरेको हो ।
अनुगमनका क्रममा आम्दा अस्पताल स्थानीय व्यवस्थापन समितिका अध्यक्ष तथा बुटवल उपमहानगरपालिकाका प्रमुख खेलराज पाण्डेय र अस्पतालका मेडिकल सुपरिटेण्डेन्ट डा विनोद पराजुलीले अस्पतालको सेवा र अवस्थाबारे जानकारी गराउनु भएकाे थियाे । सो क्रममा बुटवल उपमहानगरपालिकाका उपप्रमुख सावित्रादेवी अर्याल, बुटवल उद्योग बाणिज्य संघका अध्यक्ष हरिप्रसाद अर्याल, पूर्व अध्यक्षहरु जीवन वझा, उज्ज्वल कसजु र अस्पतालका कर्मचारी समेको उपस्थिति रहेको थियो ।
डा सुगानामीले आम्दा स्वास्थ्य विज्ञान प्रतिष्ठानमा हेल्थ असिस्टेन्ट, नर्सिङ्ग र फार्मेसी डिप्लोमा अध्ययनरत विद्यार्थीहरुसंग कुराकानी गर्दै शैक्षिक एवं भौतिक अवस्थाबारे कुराकानी गरी अध्ययनलाई प्रभावकारी रुपमा लिदै राम्रो स्वास्थ्यकर्मी बन्न आग्रह गर्नुभयाे ।
यस्तै आम्दा नेपाल सिद्धार्थ बाल तथा महिला अस्पताल स्थापनाका लागि महत्वपूर्ण भूमिका निर्वाह गर्ने बुटवल उपमहानगरपालिकाका तत्कालिन नगर प्रमुख स्वर्गीय सूर्यप्रसाद प्रधानको सम्झनामा आम्दा अस्पताल परिसरको प्रशासकीय भवनलाई सूर्यप्रसाद प्रधान स्मृति प्रशासकीय भवन नामाकरण गर्ने निर्णय गरिएको आम्दा अस्पतालका मेडिकल सुपरिन्टेन्डेन्ट डा विनोद पराजुलीले जानकारी दिनुभयाे ।
१ सय शैय्यामा रहेको अस्पताललाई गतवर्षको जेठमा ३ सय बेडमा स्तरोन्नतिका लागि आम्दा इन्टरनेशनलसँग समझदारी भइ भवन निर्माण भइरहेका छन् । आम्दा अस्पतालमा गतवर्षदेखि नर्सिङ, एच.ए. र फार्मेसी बिषयमा डिप्लोमा तहको अधययन सुरु भएको छ ।
२०५३ सालमा बुटवल उपमहानगरपालिका–७ मा सिद्धार्थ बाल तथा महिला अस्पतालको स्थापना गरिएको थियो । ५० शय्याबाट सुरु भएको अस्पताल अहिले १ सय शय्यामा सञ्चालनमा छ ।
