नेपाल उद्योग वाणिज्य महासंघ लुम्बिनी प्रदेशको अधिवेशन यहि चैत २१ गते हुने भएको छ । गत माघ १७ गते तय गरिएको महासंघ लुम्बिनी प्रदेशको आठौँ प्रदेश सभा तथा चौथो निर्वाचन (अधिवेशन) कार्यक्रम प्रतिनिधि सभा निर्वाचनको आचारसंहिताका कारण स्थगित गरिएको थियो ।
महासंघ लुम्बिनीले मातहतका जिल्ला नगर उद्योग वाणिज्य संघ तथा एशोसियट सदस्यहरुलाई सोही अनुसार परिपत्र गरी आठौँ प्रदेश सभा तथा चौथो निर्वाचन रुपन्देहीको भैरहवास्थित प्रदेश सचिवालय गरिने जानकारी गराएको छ । बिहान साढे ९ बजेको लागि तय गरिएको सभाको उद्घाटन पश्चात हुने बन्दसत्रमा अध्यक्षद्वारा सम्बोधन, गणपूरक संख्याको जानकारी, वार्षिक प्रतिवेदन प्रस्तुत, आगामी आर्थिक वर्ष २०८२÷८३ का लागि लेखा परीक्षक नियुक्ति लगायतका एजेन्डा समावेश गरिएको छ ।
सभामा जिल्ला तथा नगर उद्योग वाणिज्य संघका अध्यक्ष मुख्य प्रतिनिधिका रूपमा सहभागी हुने व्यवस्था छ भने अन्य प्रतिनिधिहरूका लागि पनि निश्चित संख्या तोकिएको छ । सहभागी हुन प्रतिनिधिहरूले वार्षिक सदस्यता शुल्क तिरेको हुनुपर्ने र प्रतिनिधि शुल्क तिर्नुपर्ने छ । त्यसका लागि १ हजार ५ सय रुपैंया प्रतिनीधि शुल्क निर्धारण गरिएको छ ।
सभा तथा अधिवेशनबाट आगामी कार्यकालको लागि नयाँ नेतृत्व चयन गरिने छ । निर्वाचनमा उम्मेदवार बन्न इच्छुक संघ÷संस्थाहरूले आवश्यक कागजातसहित चैत १५ गतेभित्र मनोनयन दर्ता गराउनु पर्नेछ । अध्यक्ष, उपाध्यक्ष, कोषाध्यक्ष र कार्यकारिणी सदस्य पदका लागि फरक–फरक मनोनयन शुल्क तोकिएको छ । उम्मेद्वारी दिएको व्यक्तक्तिले आफ्नो उम्मेदवारी फिर्ता लिएपनि बुझाएको शुल्क फिर्ता नहुनेगरी अध्यक्ष पदमा १ लाख ५० हजार रुपैंया, उपाध्यक्ष र कोषाध्यक्ष पदमा जनही ७५ हजार रुपैंया तथा कार्यकारिणी सदस्य पदमा ४० हजार रुपैंया शुल्क निर्धारण गरिएको छ ।
