बुटवल उद्योग वाणिज्य संघ रुपन्देहीले नेपाल उद्योग वाणिज्य महासंघको साधारण सभा तथा निर्वाचनका लागि संघका अध्यक्ष हरिप्रसाद अर्याललाई मुख्य प्रतिनीधिमा चयन गरेको छ । संघको शुक्रबार बसेको कार्यसमिति बैठकले महासंघको ६०औं साधारण सभा तथा निर्वाचनका लागि कार्यकारिणी सदस्यका उम्मेद्वार समेत रहेका अध्यक्ष अर्याललाई मुख्य प्रतिनिधी तथा निवर्तमान अध्यक्ष उज्ज्वलप्रसाद कसजू र वरिष्ठ उपाध्यक्ष टंकप्रसाद गैरेलाई अतिरिक्त प्रतिनीधि चयन गरेको हो ।
संघका अध्यक्ष अर्यालको अध्यक्षतामा बसेको बैठकले विगतका प्रावधानहरुलाई समेत आधार बनाएर मुख्य प्रतिनीधि र अतिरिक्त प्रतिनिधी चयन गरिएको महासचिव मुक्तिप्रसाद अधिकारीले जानकारी दिए । बुटवल उद्योग वाणिज्य संघले अध्यक्ष अर्याललाई महासंघको निर्वाचनमा खुल्ला तर्फबाट कार्यकारिणी सदस्यको रुपमा अंगाडि सारेको छ । नेपाल उद्योग वाणिज्य महासंघको निर्वाचनमा कार्यकारिणी सदस्य उम्मेद्वार समेत रहेका अध्यक्ष अर्यालले महासंघको निर्वाचनका सन्दर्भमा अहिलेसम्म भएका गतिविधि र चुनावी रणनीति सहित सम्भावित परिदृश्यका बारेमा बैठकमा जानकारी गराएका थिए ।
बैठकले संघमा ‘व्यवसाय सम्वद्र्धन कार्यक्रम’ सञ्चालन गर्ने निर्णय गरेको छ । विगतमा विजनेश इन्कुवेशन कार्यक्रम सञ्चालन गर्दै आएको संघले सोही मोडलमा औद्योगिक व्यवसाय विकास प्रतिष्ठानको सहयोगमा उक्त कार्यक्रम सञ्चालन गर्ने निर्णय लिएको हो । त्यस्तै रुपन्देहीका देवदह नगरपालिका, सैनामैना नगरपालिका र कञ्चन गाउँपालिकामा बन उद्यम कार्यक्रम सञ्चालनका लागि प्रकृया अगाडि बढाउने निर्णय गरिएको छ ।
बन उद्यम कार्यक्रम सञ्चालनका लागि डि.जि.एम. नेपालबाट प्रस्ताव माग भए बमोजिम रुपन्देहीका तीन वटा पालिकाका विभिन्न सामुदायिक बन समितिको सहयोगमा प्रथम चरणको प्रस्ताव स्वीकृति भएको छ । विस्तृत परियोजना प्रस्तावको स्वीकृति प्रश्चात सामुदायिक बन उपभोक्ता समिति र अन्य संघसंस्थाहरुको समन्वयमा कार्यक्रम अगाडि बढाईने संघका कार्यकारी निर्देशक मदनकुमार कार्कीले जानकारी दिए ।
बुटवल उद्योग वाणिज्य संघ, रुपन्देहीले नाडा अटोमोवाईल एशोसियसन अफ नेपालको उपाध्यक्षमा निर्वाचित संघका कार्यसमिति सदस्य गणेश भट्टराईलाई सम्मान गरेको छ । संघको शुक्रबार बसेको कार्यसमिति बैठकमा नाडा उपाध्यक्षमा निर्वाचित भट्टराईलाई अध्यक्ष हरिप्रसाद अर्यालले बधाई र सफल कार्यकालको शुभकामना सहित खादा ओढाएर सम्मान गरेका हुन् । संघका कार्यसमिति सदस्य भट्टराई हालै सम्पन्न नाडा अटोमोवाईल एशोसियसन अफ नेपालको अधिवेशनबाट संस्थागत तर्फको उपाध्यक्ष पदमा निर्वाचित भएका थिए ।
त्यस्तै संघकी पूर्वकार्यसमिति सदस्य मञ्जु भुसाल तथा संघका साधारण सदस्य कालिका होमियो प्याथिकका सञ्चालक माधव थापा प्रतिनीधि सभा सदस्यमा निर्वाचित भएकोमा बधाई ज्ञापन गर्ने निर्णय गरेको छ । संघकी पूर्व कार्यसमिति सदस्य भुसाल समानुपातिक तर्फबाट र थापा पाल्पाको क्षेत्र नं. २ बाट प्रत्यक्ष निर्वाचत भएका हुन् । त्यस्तै संघको कार्यालय रहेको रुपन्देहीको क्षेत्र नं. २ बाट प्रतिनिधी सभा सदस्यमा निर्वाचित शुलभ खरेल तथा यस क्षेत्रबाट समानुपातिकमा निर्वाचित प्रतिनीधि सभा सदस्य अमृता विकसहितलाई बधाई ज्ञापन गर्दै रचनात्मक कदमको अपेक्षा गरिएको छ ।
