रसुवा जिल्लाको भोटेकोशी नदीमा आएको आकस्मिक बाढीबाट रसुवा, नुवाकोट र धादिङ जिल्लाका नदी तटीय क्षेत्रमा ठूलो जनधनको क्षतिप्रति बुटवल उद्योग वाणिज्य संघ, रुपन्देहीले गहिरो दुःख व्यक्त गरेको छ । संघले बाढीका कारण जनधनसहित बजार, बस्ती, जलविद्युत् केन्द्र, यातायातका संरचना, सरकारी तथा सुरक्षा निकायका संरचना, भन्सार र बैंकलगायतका क्षेत्रमा भएको क्षतिप्रति स्तब्ध भएको जनाएको छ ।
प्राकृतिक विपद्मा परी ज्यान गुमाउने मृतकप्रति संघले भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरेको छ । साथै बाढी तथा पहिरोमा परी घाइते भएका नागरिकको शीघ्र स्वास्थ्यलाभको कामना गर्दै बेपत्ताको खोजी तथा उद्धारलाई प्रभावकारी बनाउन सम्बन्धित निकायसँग आग्रह गरेको छ ।
संघका अध्यक्ष हरिप्रसाद अर्यालद्वारा जारी विज्ञप्तिमा विपद्मा परेका परिवारलाई तत्काल सुरक्षित आवास र खाद्यान्नको व्यवस्था गर्नुपर्नेमा जोड दिइएको छ । यस्तो संकटको समयमा प्रभावित परिवारलाई राहत उपलब्ध गराउन उद्योगी–व्यवसायी तथा आम नागरिकलाई समेत सक्दो सहयोग गर्न संघले अपिल गरेको छ । संघले प्राकृतिक विपद्का बेला मानवीय संवेदनालाई प्राथमिकतामा राख्दै उद्धार, राहत र पुनःस्थापनाका कार्यमा सबै पक्षबीच सहकार्य गर्न पनि अपिल गरेको छ ।
