नेपाली काँग्रेसको १५औँ महाधिवेशनअन्तर्गत रुपन्देहीमा तय गरिएको निर्वाचन कार्यक्रम प्रतिकूल मौसमका कारण फेरबदल गरिएको छ ।
नेपाली काँग्रेस रुपन्देही जिल्ला निर्वाचन समितिले सोमबार जारी गरेको विज्ञप्तिअनुसार यसअघि २०८३ असोज ११ र १३ गतेका लागि तय गरिएको निर्वाचन कार्यक्रम स्थगित गरी नयाँ मिति निर्धारण गरिएको हो ।
जिल्ला निर्वाचन अधिकृत अधिवक्ता रामचन्द्र गौतमद्वारा जारी विज्ञप्तिमा केन्द्रीय निर्वाचन समितिको समन्वयमा निर्वाचन कार्यक्रम स्थगित गरी प्रदेश सभा क्षेत्रीय अधिवेशन २०८३ असोज १२ गते र प्रतिनिधि सभा क्षेत्रीय अधिवेशन २०८३ असोज १४ गते गर्ने निर्णय भएको उल्लेख छ ।
यसअघि तय गरिएको निर्वाचन कार्यक्रमअनुसारका गतिविधि प्रतिकूल मौसमका कारण प्रभावित हुने भएपछि नयाँ कार्यतालिका सार्वजनिक गरिएको निर्वाचन समितिले जनाएको छ ।
जिल्ला निर्वाचन समितिले संशोधित कार्यतालिकाअनुसार आवश्यक तयारी गर्न सम्बन्धित सबैलाई आग्रह गरेको छ ।
