बुटवल उपमहानगरपालिका वडा नं. ११ प्रगतिनगरमा रहेको प्रगति माध्यमिक बिद्यालय (साविक प्रगति आधारभूत बिद्यालय) मा सञ्चालन गरिएको महायज्ञको हरहिसाव सहित जिम्मेवारी बिद्यालय व्यबस्थापन समितिलाई हस्तान्तरण गरिएको छ ।
शुक्रबार महायज्ञ आयोजक मुल समितिले पत्रकार सम्मेलन गरेर महायज्ञको आम्दानी विवरण सहित त्यसको दायित्व समेत बिद्यालय व्यबस्थापन समितिलाई हस्तान्तरण गरेको हो । बिद्यालयले शैक्षिक स्तरोन्नती, पूर्वाधार निर्माण तथा गुणस्तरीय र प्रधाविधिक शिक्षामा जोड दिँदै २०७५ साल बैशाख २१ देखि २९ गतेसम्म ९ दिन महायज्ञ सञ्चालन गरेको थियो ।
पत्रकार सम्मेलनमा महायज्ञ आयोजक समितिका संयोजक जितबहादुर मल्लले बिद्यालय व्यबस्थापन समितिका अध्यक्ष नारायण सारु र प्रधानाध्यापक शिबकुमारी अर्याललाई महायज्ञको आम्दानी तथा खर्च विवरण सहितको हिसाव किताव र त्यसको बाँकी जिम्मेवारी समेत हस्तान्तरण गर्नुभएको हो ।
त्यस अवसरमा संयोजक मल्लले आजसम्म आफूले गरेको कामको फेयरिस्त प्रस्तुत गर्दै औपचारिक रुपमा जिम्मेवारी हस्तान्तरण गरेपनि बिद्यालयको उन्नतीको लागि बाँकी रहेको काममा समेत आफ्नो साथ र सहयोग रहिरहने प्रतिवद्धता व्यक्त गर्नुभयो ।
उक्त महायज्ञमा नगद जिन्सी र प्रतिवद्धता समेत गरी १ करोड ५४ लाख १६ हजार ३५१ रुपैंया संकलन भएको थियो भने ३६ लाख ५२ हजार २२४ रुपैंया खर्च भएको संयोजक मल्लले जानकारी गराउनु भयो । त्यस्तै प्रतिवद्धता गरेको रकम उठाउने क्रममा पुन थप ४ लाख २३ हजार १०७ रुपैंया सहयोगको प्रतिवद्धता भएको थियो । महायज्ञमा प्रतिवद्धा गरेको ८७ लाख १९ हजार ८६१ रुपैंया अझैपनि उठ्न बाँकी छ । अव यो रकम उठाउने जिम्मेवारी बिद्यालय व्यबस्थापन समितिमा सरेको छ ।
महायज्ञ अगाडी आधारभूत तहमा सञ्चालित उक्त बिद्यालय अहिले माध्यमिक तहमा सञ्चालन गरिएको छ भने कुल ५५५ जना बिद्यालय अध्ययनरत रहेको प्रधानाध्यापक अर्यालले जानकारी गराउनु भयो । त्यस्तै १८ जना शिक्षक कर्मचारी रहेको बिद्यालयले ३ जना नीजि क्षेत्रबाट शिक्षक राखेको र अझै पनि उनीहरुलाई तलव खुवाउन समस्या भएको उहाँले बताउनु भयो ।