आगामी फागुन २१ गते हुने प्रतिनीधि सभा निर्वाचनको सन्दर्भमा नेपाली काँग्रेसले निर्वाचनको परिणाम आफ्नो पक्षमा पार्नेगरी चुनावी रणनीति बनाउनुको साथै निर्वाचन परिचालन मुल समिति गठन गरेको छ । नेपाली काँग्रेसले पार्टीका क्षेत्रीय सभापति प्रजापाल गिरीको नेतृत्वमा निर्वाचन परिचालन मुल समिति गठन गरेको हो ।
निर्वाचन परिचालन मुल समितिमा क्षेत्रका २ वटै प्रदेश सभाका सभापतिहरु, तीन वटै नगरसमितिका सभापतिहरुलाई सहसंयोजकको जिम्मेवारी प्रदान गरिएको छ भने कुल ८ हजार ५६५ सदस्यीय निर्वाचन परिचालन मुल समिति गठन गरिएको क्षेत्रीय सचिव तथा निर्वाचन परिचालन मुल समितिका सदस्यसचिव विमलराज भट्टराईले जानकारी गराउनु भयो । त्यसैगरी यस क्षेत्रबाट केन्द्रीय सदस्य, यस अगाडिका निर्वाचनका उम्मेद्वारहरु लगायतलाई समेटेर सल्लाहकार समिति गठन गरिएको छ । त्यस्तैगरी विभिन्न विषयगत समितिहरु समेत गठन गरिएको छ ।
रुपन्देही क्षेत्र नं. २ मा नेपाली काँग्रेसले समाजसेवी उद्योगपती चुन्नप्रसाद पौडेललाई उम्मेद्वार बनाएको छ । पौडेल पार्टीको महासमिति सदस्य समेत रहनु भएको छ । उहाँले पार्टीको १४ औं महाधिवेशनमा यसै क्षेत्रबाट सबैभन्दा बढी मत पाएर महाधिवेशन प्रतिनीधि तथा महासमिति सदस्य निर्वाचित हुनु भएको थियो । नेपाली काँग्रेसले यसै क्षेत्रबाट काँग्रेस नेतृ रिता सेन वलीलाई समाुनपातिक उम्मेदवारको सूचीमा राखेको छ ।
‘बदलियो काँग्रेस, बदल्छौं देश’ नारा तय गरेको काँग्रेसले आसन्न निर्वाचनमा अधिकांश नयाँ अनुहारलाई उम्मेद्वार बनाएको छ । यस क्षेत्रमा उम्मेदवार बन्नुभएका पौडेल पनि पहिलो पटक चुनावी प्रतिस्पर्धामा उत्रिनु भएको हो । यस अंगाडिका निर्वाचनमा यो निर्वाचन क्षेत्रमा आफ्नै चुनाव चिन्ह रुखमा मतदान गर्न नपाउँदा काँग्रेसीहरु निरास थिए । अहिले पार्टीकै उम्मेदवार र आफ्नै चुनाव चिन्हमा मतदान गर्न पाउने भएकाले पनि काँग्रेसीहरुमा उत्साह थपिएको क्षेत्रीय सभापति प्रजापाल गिरी बताउनु हुन्छ ।
काँग्रेसीहरुमा जागेको उत्साहमा खुसी थप्नका लागि जित निकाल्नुपर्ने दवावमा पार्टी रहेको र त्यसै अनुसारका रणनीति बनाएर प्रचारप्रसार, घरदैलो लगायतका गतिविधि अगाडी बढाईने पनि उहाँले बताउनु भयो । ‘यस अगाडिका निर्वाचनमा विभिन्न दलहरुसंग भएको गठबन्धनका कारण पार्टीको मत तितरवितर भएको र समानुपातिकमा समेत मत घटेको अवस्थामा आसन्न निर्वाचनमा पार्टीकै उम्मेदवार र पार्टीकै चुनाव चिन्हमा मतदान गर्न पाउने भएपछि काँग्रेसीलाई मात्रै नभई आम मतदातालाई काँग्रेसप्रति आशा जागेको छ ।’ क्षेत्रीय सभापति गिरीले भन्नुभयो–‘मतदाताको आशा, पार्टीप्रतिको भरोसा र हामीप्रतिको विश्वासमा कुठाराघात हुनेछैन, मतदातालाई हामी विश्वास दिलाउन चाहन्छौं, हाम्रो जित निश्चित छ ।’
यो निर्वाचनमा नेपाली काँग्रेसले अरुलाई हिलो नछ्याप्ने र मतदातालाई सफेद अनुहार देखाउने रणनीति बनाएको छ । चुनाव प्रचारप्रसारका क्रममा अरु दल र तीनका उम्मेद्वारलाई गाली नगरिकनै आफूले देखेको भिजन र बनाएका योजना मतदानलाई देखाएर मत माग्ने पार्टीले रणनीति बनाएको क्षेत्रीय सभापति गिरी बताउनु हुन्छ ।
यो निर्वाचन क्षेत्रमा काँग्रेसले समान रुपमा एमाले र रास्वपा दुबै दलका उम्मेद्वारलाई प्रमुख प्रतिस्पर्धीको रुपमा हेरेको छ । त्यसै अनुसार चुनावी रणनीति बनाएको काँग्रेसले आफ्ना उम्मेद्वार सहित नेता कार्यकर्तालाई आचारसंहिताको लगाम लगाएको छ । पार्टीले बनाएको विधि, लिएको नीति तथा गरेका निर्णय र बनाईएका योजनाका आधारमा गतिविधि अगाडि बढाउने गरी आचारसंहिता बनाएर कार्यान्वयनमा ल्याईएको उहाँले बताउनु भयो ।
लामो समयदेखि यस क्षेत्रमा जित निकाल्न नसकेको काँग्रेसका लागि अहिलेको निर्वाचन एउटा राम्रो अवसर पनि हो । आफ्नै उम्मेदवार, पार्टीकै चुनाव चिन्हमा मतदान गर्न पाउने भएपछि काँग्रेसमा बलियो एकता देखिएको छ । काँग्रेसका नेता कार्यकर्तामा देखिएको उत्साहले उम्मेद्वारलाई समेत थप उत्साहित बनाएको छ, बल पु¥याएको छ । काँग्रेस उम्मेद्वार चुन्नप्रसाद पौडेलले निर्वाचनमा जित निकाल्न सकियो भने आफ्नो भन्दा पनि पार्टीको जित हुने बताउनु भयो ।
