प्रत्यक्षमा १८ क्षेत्र जितेको काँग्रेस ८२ क्षेत्रमा दोस्रो

सम्पन्न प्रतिनीधि सभा सदस्य निर्वाचनमा १८ सिटमा खुम्चिएको नेपाली काँग्रेस संसदमा दोस्रो दल बनेको छ । सम्पन्न निर्वाचनमा प्रत्यक्ष तर्फ १८ निर्वाचन क्षेत्रमा जितेको नेपाली काँग्रेस ८२ स्थानमा दोस्रो भएको छ । निर्वाचन आयोगका अनुसार १६५ निर्वाचन क्षेत्रमध्ये नेपाली काँग्रेसले १८ निर्वाचन क्षेत्रमा जित निकालेर संसदमा दोस्रो दल बनेको हो ।
प्रत्यक्ष निर्वाचनमा राष्ट्रिय स्वतन्त्र पार्टीले १२५ निर्वाचन क्षेत्रमा जितेर पहिलो र संसदको शक्तिशाली दल बनेको छ । प्रत्यक्ष तर्फ १८ सिटमा खुम्चिएको नेपाली काँग्रेस ८२ स्थानमा उपविजेता भएको हो । आयोगको तथ्यांकअनुसार नेकपा एमाले ४१ र नेपाली कम्युनिस्ट पार्टी १८ निर्वाचन क्षेत्रमा उपविजेता भएका छन् ।
त्यस्तै, रास्वपाले जित्न नसकेका ६ निर्वाचन क्षेत्रमा जनता समाजवादी पार्टी (जसपा) नेपाल दोस्रो बनेको छ । नयाँ दल श्रम संस्कृति पार्टी ४ क्षेत्रमा, राप्रपा, उज्यालो नेपाल पार्टी, नेपाल मजदुर किसान पार्टी, नागरिक उन्मुक्ति पार्टी, नेपाल संघीय समाजवादी पार्टी र स्वाभिमान पार्टी एक–एक क्षेत्रमा दोस्रो स्थानमा आएका छन् ।

समानुपातिक प्रणालीको समेत मतगणना सम्पन्न भईसकेको छ । जसमा क्रमशः राष्ट्रिय स्वतन्त्र पार्टी (रास्वपा), नेपाली काँग्रेस, नेकपा एमाले, नेपाली कम्युनिष्ट पार्टी (नेकपा), श्रम संस्कृति पार्टी र राष्ट्रिय प्रजातन्त्र पार्टी (राप्रपा) ३ प्रतिशतको थ्रेसहोल्ड कटाएर राष्ट्रिय दल बनेका छन् । निर्वाचनमा भाग लिएका ६८ दल मध्ये बाँकी दलले ३ प्रतिशतको थ्रेसहोल्ड कटाउन सकेनन् ।

नेपाली काँग्रेस उपविजेता भएका प्रदेश अनुसारका निर्वाचन क्षेत्रहरु :

१. कोशी प्रदेश (१२ निर्वाचन क्षेत्र) : ताप्लेजुङ–१, इलाम–२, झापा–१, धनकुटा, मोरङ–३, ४, ५, ६, सुनसरी–२, ३, ४, ओखलढुंगा ।
२. मधेश प्रदेश (१३ निर्वाचन क्षेत्र) : सप्तरी–४, सिराहा–१, धनुषा–२, ३, ४, सर्लाही–१, ४, रौतहट–४, बारा–१, ३, पर्सा–२, ३, ४ ।
३. बागमती प्रदेश (२० निर्वाचन क्षेत्र) : धादिङ–२, नुवाकोट–१, २, काठमाडौं–१, २, ४, ५, ६, ७, ९, १०, ललितपुर–१, २, ३, काभ्रे–१, २, सिन्धुपाल्चोक–२, मकवानपुर–१, चितवन–१, २ ।
४. गण्डकी प्रदेश (१२ निर्वाचन क्षेत्र) : गोरखा–१, २, कास्की–१, ३, तनहुँ–१, २, स्याङ्जा–१, २, नवलपरासी–१, बाग्लुङ–१, २, पर्वत ।
५. लुम्बिनी प्रदेश (१२ निर्वाचन क्षेत्र) : पाल्पा–२, रुपन्देही–१, ३, कपिलबस्तु–२, रोल्पा, प्युठान, दाङ–१, ३, बाँके–१, बर्दिया–२, नवलपरासी–१, २ ।
६. कर्णाली प्रदेश (३ निर्वाचन क्षेत्र) : दैलेख–२, सुर्खेत–२, रुकुम पश्चिम ।
७. सुदूरपश्चिम प्रदेश (१० निर्वाचन क्षेत्र) : अछाम–२, बझाङ, कैलाली–१, ४, ५, दार्चुला, बैतडी, डडेल्धुरा, कञ्चनपुर–२, ३ ।