नेपाली युवा व्यबसायी राजन कंडेल लण्डनको ७० वर्ष पुरानो बिद्यालयको अध्यक्षमा नियुक्त हुनु भएको छ । काठमाडौँको थापाथलीस्थित ‘द ब्रिटिस कलेज’का कार्यकारी अध्यक्ष कंडेल बेलायतको उत्कृष्ट शैक्षिक संस्था ‘न्यूस्टेड वुड स्कूल’को अभिभावक संघको अध्यक्षमा नियुक्त हुनु भएको हो ।
सन १९५४ देखि बेलायतको साउथ इष्ट लण्डनमा सञ्चालन हुँदा आएको उक्त शैक्षिक संस्था (बिद्यालय) लण्डनमा उत्कष्ट ११ मा परेको छ । यो बिद्यालयले ११ देखि १७ वर्ष उमेर समूहका बालबालिकालाई विश्वस्तरीय शिक्षा प्रदान गर्दै आएको बताइएको छ । लामो समयदेखि शैक्षिक क्षेत्रमा लगानी गर्दै आउनु भएका युवा व्यबसायी कंडेल अभिभावक संघको अध्यक्षमा नियुक्त भएपछि आफू सम्मानित भएको महशुस गर्दै खुसी व्यक्त गर्नुभयो । विश्वस्तरिय शिक्षा प्रदान गरिरहेको शैक्षिक संस्थासँग काम गर्न पाउनु आफ्नो लागि सौभाग्य भएको प्रतिक्रिया दिनुभयो । उहाँले भन्नुभयो–‘मलाई आशा छ, स्कुल, सरोकारवाला निकाय तथा अभिभावकहरुको सहयोग तथा समर्थनमा बिद्यालयलाई थप उचाईमा पुर्याउन सकिन्छ ।’
साथै न्युस्टेड वुड स्कूलको आफ्नै आधारभूत मान्यताहरु भएको र ती मूल्य मान्यतालाई आफूले संचालन गर्दै आएका शैक्षिक संस्थाहरुमा पनि कार्यान्वयन गर्न सघाउने विश्वास लिएको बताउनु भयो ।
कंडेलले हालै नेपालमा दुईवटा शैक्षिक संस्थाहरुको स्वामित्व लिनु भएको छ । रुपन्देहीको तिलोत्तमामा रहेको नमस्ते एकेडेमी र चितवनस्थित मदरल्याण्ड स्कुलको स्वामित्व लिएका लिएका कंडेलले दुबै संस्था ब्रिटिश एजुकेशन ग्रुपको हिस्सा बन्ने बताउनु भयो ।
न्यूस्टेडसँगको आबद्धताले नेपालमा पनि सोही प्रकारको शैक्षिक संस्कारको बिकास गर्न सकिने युवा व्यबसायी कंडेलले विश्वास व्यक्त गर्नुभयो । द ब्रिटिस एजुकेशन ग्रुपले नेपाल सहित दुबई तथा बेलायतमा पनि शैक्षिक संस्थाहरु संचालन गर्दै आएको छ ।