अनुदान प्राप्त गर्ने पशुपालकलाई अनिवार्य बिमा

548

अनुदान प्राप्त गर्ने पशुपालकलाई अनिवार्य बिमा

goatकञ्चनपुर, १७ असोज । अनुदान प्राप्त गरी व्यवसायीक पशुपालनको कार्यमा संलग्नका लागि पशु सेवा कार्यालय कञ्चनपुरले अनिवार्य बिमा कार्यक्रम लागु गरेको छ ।

व्यवसायीक पशुपालनमा संलग्नका पशुहरु महामारीजन्य प्रकोप, रोग व्याधि र भवितव्यबाट हुने हानीबाट जोगाउनका लागि पशु बीमा अनिवार्य गरिएको हो । शुपालकले बिमा गरेको कागजपत्र संलग्न राखेमा मात्रै कार्यालयले अनुदानका लागि सिफारि गर्ने व्यवस्था गरेको पशु सेवा कार्यालयका सुचना अधिकारी शंंकरदत्त जोशीले बताउनुभयो ।

“पशुको बिमा नगरिएको पशुपालकलाई कार्यालयले अनुदान रकम उपलव्ध नगराउने भएपछि पशुको बिमा गराउनेको सङ्ख्या बढदै गएको छ” उहाँले भन्नुभयो ।

हालसम्म कार्यालयबाट पशुपालनका लागि अनुदान प्रदान गरिएका एक सय नौ जना पशुपालकले गाई, बाख्रा, भैँसी र बङ्गुरको बिमा गरिएको छ ।

बिमा गरेका पशुपालकले पशुको क्षतिमा ८० प्रतिशतसम्म क्षतिपूर्ति रकमसँगै औषधोपचार खर्च उपलव्ध गराइने भएकाले यसप्रति पशुपालकको आर्कषण बढ्दै गएको छ ।

बिमा गरिएको पशुको ७० प्रतिशत रकम सरकारले र पशुपालकले ३० प्रतिशत रकम व्यहोर्नुपर्ने व्यवस्था रहेको जोशीले बताउनुभयो । साना पशुको रु २५ हजार र ठुला पशुको रु ९० हजारसम्मको बिमा गर्न सकिने उहाँले बताउनुभयो ।

“बिमा गरेको पशुको मृत्यु भएमा पञ्चकृत मुल्य निर्धारण गर्न लगाई बिमा वाफतको रकम पशुपालक वीमाकर्तालाई प्रदान हुन्छ” वरिष्ठ पशु विकास अधिकृत डा मदनसिंह धामीले भन्नुभयो ।

यसैगरी, सुडाको साना किसान कृषि सहकारी संस्था लिमिटेड र चाँदनीको सृजना नमुना सहकारी संस्थाले समेत पशु बिमा कार्यक्रम सञ्चालन गर्दै आएका छन् ।

पशु बिमा कोष समितिमा आबद्ध सुडाका चालिस जना र चाँदनीका पचास जना पशुपालकले व्यवसायीकरुपमा पालेका पशुको बिमा गरेका छन् । रासस